جەمیل بایک: هێرشەکانی سەر ڕۆژئاوا بۆ لەناوبردنی ئیرادەی کوردە

ئاڤا نیوز

هاوسەرۆکی گشتیی کەجەکە ڕادەگەیەنێت، هێرشەكانی سەر ڕۆژئاوای کوردستان تەنیا ڕەهەندی سەربازییان نییە، بەڵکوو ئامانجی سەرەکییان لەناوبردنی کۆمەڵگەی دیموکراتی و شکاندنی ئیرادەی گەلی کوردە لە ناوچەکەدا.

لێدوانی فەرمی: جەمیل بایک، هاوسەرۆکی گشتیی کەجەکە بە میدیای نزیک لە پارتی كرێكارانی كوردستان (پەكەكە)ی ڕاگەیاند، ڕۆژئاوای کوردستان بەهۆی شۆڕشە دیموکراسییەکەیەوە دەکرێتە ئامانج؛ چونکە بووەتە ڕێگر لە بەردەم جەنگی دابەشکاریی نوێ لە ڕۆژهەڵاتی ناوەڕاستدا.

٠ بایک ئاماژەی بەوە کرد، هێزە نێودەوڵەتییەکان بەرژەوەندیی خۆیان لەگەڵ دەوڵەتە ناوەندییەکان دەبیننەوە، بۆیە چاویان لە ئاست هێرشەکان دەپۆشن تاوەکوو مۆدێلی ئیدارەی خۆسەر و ئازادیی ژن بە تەواوی پەراوێز بخەن.

٠ ناوبراو جەختی کردەوە، مۆدێلی کۆمەڵگەی دیموکراتی و ژینگەپارێز لە ڕۆژئاوا هەڕەشەیە بۆ سەر سیاسەتی هێزە باڵادەستەکان، هەر بۆیە دەیانەوێت لە ڕێگەی گوشارە سەربازی و بیروباوەڕییەکانەوە ئەو ئەزموونە سەرکەوتووە بە تەواوی لە ناو ببەن.

ئەمەش بزانە: هاوسەرۆکی کەجەکە دووپاتی کردەوە، پڕۆژەی نەتەوەی دیموکراتی تەنیا چارەسەرە بۆ کۆتایی هێنان بە سیاسەتی قڕکردن، کە دەبێتە هۆی گۆڕینی سەدەی بیست و یەک بۆ سەدەی سەرکەوتن و ئازادیی هەمیشەیی بۆ کورد لە هەر چوار پارچەدا.