بزانە حكومەتی هەرێمی كوردستان چی بۆ حاجیان كردووە؟

ئاڤا نیوز

بەمەبەستی دابینکردنی ئاسانکاری و خزمەتگوزاریی پێویست بۆ حەجخوازان، حکومەتی هەرێمی کوردستان چەند هەنگاوێکی پێویستی ناوە و هاوکات بودجەی تەرخانکراویشی بەراورد بە ساڵانی ڕابردوو زیاتر کردووە. 

 

چیرۆکی سەرەکی: ئەمساڵ بەشداریكردنی فەریزەی حەج بۆ حاجیانی هەرێمی كوردستان جیاواز دەبێت، بەو پێیەی بە فەرمانی سەرۆكوەزیران مەسرور بارزانی و بە هەوڵی پشتیوان سادق، وەزیری ئەوقاف و كاروباری ئایینی، بەڕێوەبەرایەتیی گشتیی حەج و عومرە كۆمەڵێك خزمەتگوزاری و شایستەی نوێ و بەخۆڕایی بۆ حەجخوازانی هەرێمی كوردستان دەستەبەركردووە.

 

ژمارەکان وادەڵێن: ئەمساڵ 450 پشك بۆ حاجیانی هەرێمی كوردستان زیاد كرا، پارساڵ 4865 كەس بەشداری فەریزەی حەجیان كرد بەڵام ئەمساڵ ڕێژەكە بۆ 5136 كەس بەرزكرایەوە.

 

- لە ساڵی 2023، حكومەتی هەرێم بە بڕی 330 هەزار دۆلار پاڵپشتیی پرۆسەی حەجی كرد، ساڵی ڕابردووش بە بڕی نزیكەی 3 ملیار دینار پاڵپشتی پرۆسەكەی كرد، بۆ وەرزی حەجی ئەمساڵیش مەسرور بارزانی، سەرۆكی حكومەتی هەرێمی كوردستان، وەزیری ئەوقاف و كاروباریی ئایینی ڕاسپارد بە بڕی سەرووی 4 ملیار دینار پاڵپشتی پرۆسەی حەج بكات.

 

- كەمكردنەوەی تێچووی گەشتی حەج بۆ هەر حاجییەك، بەجۆرێك؛ بەڕێگەی وشكانی لە (شەش ملیۆن و 350 هەزار دینار) بۆ ( پێنج ملیۆن و 500 هەزار دینار)  واتە هەر حەجخوازێك تێچووی گەشتەكەی 850 هەزار كەمبووەتەوە و بەهۆیەوە هەزار و 646 حاجیی كوردستان سوودمەند بوون.

 

- كەمكردنەوەی تێچووی گەشتی حەج بۆ هەر حاجییەك كە بەڕێگەی ئاسمانی گەشت دەكات لە ( حەوت ملیۆن و 650 هەزار دینار) بۆ ( حەوت ملیۆن دینار) بەهۆیەوە سێ هەزار و 490 حاجی لێی سوودمەند بوون.

 

- 50 فەرمانبەر لە وەزارەت ئەوقاف و بەڕێوەبەرایەتیی حەج و عومرە، 25 پزیشك و كارمەندی تەندروستی، 39 ڕێنیشاندەری ئایینی، 5 موفتی، 112 خاوەن كۆمپانیای حەج و عومرە، سێ شێف كە ڕۆژانە سەرپەرشتیی چێشتی حاجیان دەكەن، هاوسەفەری حاجیانی كوردستانن و سەرجەمی تێچووی گەشتەكانیان لە ئەستۆی حكومەتی هەرێمی كوردستانە.

 

ئەمەش بزانە: هەروەها ئەمساڵ چەندین خزمەتگوزاری و پێداویستی دیکە پێشکەش بە حەجخوازانی هەرێمی کوردستان دەکرێت لەوانە:- 

- پێدانی دیاریی جۆراوجۆر بە حاجیان بەخۆڕایی.
- دابینكردنی ئێلەگ بۆ پیاوان و چەفیە بۆ ئافرەتان .
- دابینكردنی سەرجەم دەرمان و پێداویستی پزیشكی بۆ حاجیان بەخۆڕایی.
- دابینكردنی شوێنی نیشتەجێبوون لەنزیكترین خاڵی حەرەمی مەككە، بەجۆرێك حاجیانی كورد دەتوانن سەرجەم نوێژە فەرزەكان بەپیادە و بە كاتێكی كورت بگەنە مزگەوتی حەرەم.
- دابینكردنی هەر سێ ژەمی خۆراكی ڕۆژانە بەشێوەی بۆفیەی كراوە بە سەرپەرشتیی شێفی شارەزا.