دوای گیانلەدەستدانی دوو قوتابی، سوودانی فەرماندەیەکی نوێ بۆ ئەکادیمیای سەربازی دادەنێت

ئاڤا نیوز

 

سەرۆکوەزیرانی عێراق بڕیاریدا بە ڕاسپاردنی فەریق ڕوکن ئەحمەد جەنابی بۆ سەرۆکایەتیکردنی ئەکادیمیای سەربازی لە شوێنی ناسر غەننام.

 

چیرۆکی سەرەکی: دوابەدوای گیانلەدەستدانی دوو قوتابی کۆلێژی سەربازیی ناسریە، محەممەد شیاع سوودانی، سەرۆکوەزیران و فەرماندەی گشتیی هێزە چەکدارەکانی عێراق، فەرمانی دوورخستنەوەی هەر یەکە لە سەرۆکی ئەکادیمیای سەربازی و یاریدەدەرەکەی و ڕاگری کۆلێژی سەربازیی چوارەم و فەرماندەی فەوجی پەیوەندیدار لە ئەرکەکانیان، دا.

 

زانیاریی بەدەستهاتوو: بەگوێرەی سەرچاوەیەک لە سوپا کە قسەی بۆ میدیای عێراق کردووە، ئاماژە بۆ ئەوە دەکات، فەریق ڕوکن ئەحمەد جەنابی کەسێکی لێهاتووە لە بواری ئەکادیمی لە دامەزراوە سەربازییەکان و پێشتر ڕاگری کۆلێژی بەرگریی نیشتمانی بووە لە زانکۆی بەرگری و هەروەها سەرۆکایەتیی ئەکادیمیای کەنداوی عەرەبی کردووە لە بەسرە.

 

زانیاریی زیاتر: دەستنیشانکردنی جەنابی، هاوتایە لەگەڵ ئاراستەی سەرۆکوەزیران بۆ پێدانی پۆستی سەربازی بە کەسانی خاوەن پێشینەی ئەکادیمی و پیشەیی بۆ بەرزکردنەوەی توانای مەشق و لێهاتوویی لەناو دامەزراوە سەربازییەکاندا.

 

باکگراوند: نیوەڕۆی ڕۆژی 2025-05-21، دوو قوتابی کۆلێژی سەربازیی ناسریە لە ئەنجامی بەرکەوتنی ڕاستەوخۆی خۆر و لەژێر تینی گەرما بۆ ماوەی شەش کاتژمێری بەردەوام، گیانیان لەدەستدا.