لەسەر مووچە داواکارییەک ئاڕاستەی کۆمەڵگەی نێودەوڵەتیی دەکرێت

ئاڤا نیوز

 

کۆنفیدراسیۆنی ڕەوەندی کوردستانی، لەسەر بڕینی مووچەی مووچەخۆران لەلایەن بەغداوە بەیاننامەیەکی تووندی بڵاوکردەوە و ڕایدەگەیێنێت: وەرگرتنی مووچە، مافێکی بنەڕەتی مووچەخۆرانە، ناکرێت تێکەڵ بە ئەجێندای سیاسی بکرێت و ببێتە ماددەی هەڵبژاردن.

 

وێنە گەورەکە: بەپاساوی ئەوەی هەرێمی کوردستان پشکی لە بودجەدا تەواوبووە و داهاتی ناوخۆشی ڕادەستنەکردووە، ڕۆژی 28ـی ئایار تەیف سامی، وەزیری دارایی عێراق واژۆی لەسەر نووسراوێک کردووە و تێیدا ئاماژەی بەوە کردووە، چیتر مووچەی فەرمانبەرانی کوردستان خەرج ناکات.

 

ڕاگەیێنراوی فەرمی: لە بەیاننامەکەی کۆنفیدراسیۆنی ڕەوەندی کوردستانیدا هاتووە: بە تووندی هەڵوێستی شۆڤێنیانەی حکومەتی عێراق، سەرکۆنە و ڕەتدەکەینەوە و بەرگری لە مافە ئابووری و مافە ڕەواکانی هەرێمی کوردستان دەکەین. ئەو کارەی عێراق پێشێلکردنی ئاشکرای مافە دەستوورییەکانی فەرمانبەرانی هەرێمی کوردستانە و دژی جارنامەی گەردوونی مافی مرۆڤ، دەستوری عێراق و ڕێککەوتننامە ناوخۆییەکانی عێراقە. بێدەنگی حکومەتی عێراق، جینۆسایدێکی ئابوورییە دەرهەق بە کۆمەڵانی خەڵکی کوردستان. 

 

ئەوەی پێویستە بیزانیت: کۆنفیدراسیۆنەکە چوار داواکاریی ئاراستەی کۆمەڵگەی نێودەوڵەتی و حکومەتی عێراق دەکات:

 

‏‎یەکەم: حکومەتی عێراق پابەندی ڕێککەوتنە داراییەکانی لەگەڵ حکومەتی هەرێمی کوردستان و یاسای بودجە بێت.

‏‎دووەم: داوا لە کۆمەڵگەی نێونەتەوەیی و نەتەوەیەکگرتووەکان و تەواوی مرۆڤدۆستانی جیهان دەکەین، هەڵوێست وەربگرن بەرامبەر بە سیاسەتی برسیکردنی کوردستانییان.

سێیەم: ئێمە وەک کۆنفیدراسیۆنی ڕەوەندی کوردستانی، داوا لە پارتە سیاسییەکان و ڕێکخراوەکان، میدکاران، کەسانی ئەکادیمی و ڕۆشنبیرانی هەرێمی کوردستان دەکەین، بێ دەنگ و بێ هەڵوێست نەبن بەرامبەر بەو پێشلکارییە ڕوونەی حکومەتی عێراق هەمبەر بە گەلەکەمان.

 

‏‎چوارەم: داوا لە باڵیۆزخانەکانی وڵاتانی جیهان دەکەین، کە لەنێو خاکی هەرێمی کوردستان بارەگایان هەیە، هەڵوێستی جددی بەرامبەر بەم پێشلکارییە دەستوورییە پیشان بدەن.

‏‎ئەمەش بزانە: کونفیدراسیۆنی ڕەوەندی کوردستانی، بە هەموو شێوەیەک پشتیوانی لە خاک و ئاڵا و مافەکەکانی نەتەوەکەمان لە باشووری کوردستان دەکات، داوای چارەسەری کێشەکان بە ڕێگەی دانوستاندن و گفتوگۆی ئاشتییانە دەکاتەوە.