وەزارەتی ئاوەدانکردنەوە: 28%ـی عێراقییەکان یەکەی نیشتەجێبوونیان نییە

ئاڤا نیوز

 

وەزارەتی ئاوەدانکردنەوە و نیشتەجێکردنی عێراق ئاشکرای دەکات، بەگوێرەی سەرژمێرییە گشتییەکەی ئەمدواییە، 28%ی هاووڵاتییانی عێراق خاوەنی یەکەی نیشتەجێبوونی تایبەت بە خۆیان نین.

 

وێنە گەورەکە: بەپێی وەزارەتی پلاندانان، عێراق پێویستیی بە نزیکەی چوار ملیۆن یەکەی نیشتەجێبوون هەیە، دەستەی وەبەرهێنانی ئەو وڵاتەش دەڵێت، لە دوو ساڵدا 320 هەزار یەکەی نیشتەجێبوون بە گوژمەی 34 مليار دۆلار دروستکراوە، ئێستاش 11 شاری نوێ لە بەغدا و پارێزگاکان لە قۆناغی دروستکردندان. بە بڕیاری حکومەتی عێراق ڕێژەیەکی دیاریکراو بۆ هەژار و کەمدەرامەت و کەمئەندامان تەرخان دەکرێت.

 

ڕاگەیێنراوی فەرمی: نەبیل سەفار، وتەبێژی وەزارەتی ئاوەدانکردنەوە و نیشتەجێکردن ڕایگەیاند: چینی هەژار و خاوەن داهاتی سنووردار یەکەی نیشتەجێبوونیان پێدەدرێت، ئەوەش لە چوارچێوەی پرۆژەکانی وەبەرهێنان لە کەرتی شارە نوێکانی نیشتەجێبوون کە هەر پرۆژەیەک ڕێژەی 10 بۆ 25٪ی بۆ ئەو مەبەستە تەرخان دەکرێت.

 

زانیاریی زیاتر: بەگوێرەی سەرژمێریی دانیشتووان 28٪ـی هاووڵاتییان یەکەی نیشتەجێبوونی تایبەت بە خۆیان نییە، ڕێژەکە لەنێوان پارێزگاکاندا بەپێی چڕی دانیشتووان و ئاستی هەژاری دەگۆڕێت.