ئەنجوومەنی وەزیرانی عێراق چەندین پرسی تاوتوێ کرد، مووچەی خەڵکی کوردستان نەبێت

ئاڤا نیوز

ئەنجوومەنی وەزیرانی عێراق ئەمڕۆ سێشەممە بە سەرپەرشتی محەممەد شیاع سوودانی، سەرۆکوەزیران و ئامادەبوونی تەیف سامی، وەزیری دارایی، کۆبوونەوەی ئاسایی خۆی ئەنجامدا کە چەندین تەوەر و بابەتی جیای تاوتوێ کردووە، بەبێ ئەوەی هیچ لە بڕگەکانی باسی پرسی مووچەی هەرێمی کوردستان و ناردنی بەر لەجەژن بکات. 

وێنە گەورەکە: چاوەڕێ دەکرا لە کۆبوونەوەی ئەمڕۆی ئەنجوومەنی وەزیرانی عێراقدا، سوودانی بابەتی ناردنی مووچەی مانگی ئایاری فەرمانبەرانی کوردستان بخاتە دەنگدانەوە و بەشێوەی قەرز، مینحە یان سولفە پارەکە بنێردرێت، بەڵام لە کۆبوونەوەکەدا باسی ئەم بابەتە نەکرا، زیاتر دۆسییەکانی بەرهەمهێنانی زیاتری کارەبا و وەبەرهێنان گفتوگۆی لەسەر کراوە.

ڕاگەیێنراوی فەرمی: نووسینگەی سەرۆکوەزیرانی عێراق ناوەڕۆکی بڕیار و تەوەرەکانی کۆبوونەوەی ئەمڕۆی ئەنجوومەنی وەزیرانی بڵاوکردەوە، لەکۆبوونەوەکەدا بڕیاردراوە بەبۆنەی جەژنی قوربانەوە لە 6 تا 10ی حوزەیران بکرێتە پشوو، هەروەها 15ی حوزەیرانیش بەبۆنەی جەژنی غەدیرەوە پشووی فەرمی دەبێت.

لەلایەکی دیکەوە: پەیوەست بە ئامادەکاری بۆ وەرزی هاوین،  ئەنجوومەنی وەزیران گرێبەستی لەگەڵ هاوپەیمانی کارپور واژۆکرد بۆ دابینکردنی 650 مێگاوات، بڕیاری دامەزراندنی پێگەی (FSRU)یشیدا بۆ هاوردەکردنی غاز بەتوانای هاوردەکردنی ڕۆژانە 750 ملیۆن پێ سێجا غاز.

هاوکات، پەیوەست بە کەرتی وەبەرهێنانیش ئەنجوومەنی وەزیران بڕیاریدا بە بەهای سێ ترلیۆن دینار شایستەی پڕۆژەکانی وەبەرهێنان لە پارێزگاکان و وەزارەتەکان خەرج بکرێت. پەیوەست بە تەرخانکردنی زەویش بۆ وەبەرهێنەران و مافی وەبەرهێنەریش لەو زەوییانەی پێیدەدرێت چەند ڕێنماییەکی نوێی پەسەندکرد.