سزای 15 ساڵ زیندانی بۆ بەرپرسێکی باڵای کەرکووک دەردەکرێت

ئاڤا نیوز

دەستەی دەستپاکیی فیدراڵیی عێراق ڕایدەگەیێنێت، سزای غیابی 15 ساڵ زیندانی بۆ بەڕێوەبەری نووسینگەی لقی بانکێکی ئەهلی لە کەرکووک دەرکراوە، لەسەر "دزینی" بڕە پارەیەک.

وێنە گەورەکە: لە دوای ساڵی 2003 گەندەڵی لە عێراق بووەتە باوترین دیاردە و سەرجەم دامەزراوەکانی دەوڵەتی گرتووەتەوە، ئێستاش گەیشتووەتە ئاستێكی مەترسیدار و حکومەت ناتوانێت بنبڕی بکات.

 

ڕاگەیێنراوی فەرمی: بە گوێرەی ڕاگەیێنراوی دەستکە، بڕیارەکە لەلایەن دادگای تاوانەکانی کەرکووکەوە دژ بە تۆمەتباری هەڵاتوو "نەمیر خەلیل محەمەد عەلی سەعید داودی" دەرچووە، کە وەک بەڕێوەبەری نووسینگەی لقی بانکێکی ئەهلی لەناو یەکێک لە زانکۆکانی ناحیەی پردێ لە کەرکووک کاری دەکرد.

 

هۆکارە زانراوەکان: بەگوێرەی دەستەی دەستپاکی، تۆمەتباری هەڵاتوو بڕی 234 ملیۆن و 945 هەزار دیناری عێراقی دزیوە کە کرێی خوێندنی مانگەکانی (کانوونی دووەم و شوباتی ساڵی 2022)ـی خوێندکارانی زانکۆ بووە.

 

ڕێوشوێنەکان: جگە لە بڕیاری 15 ساڵ زیندانیکردن، فەرمانی گرتن، قەدەغەکردنی گەشتکردن، دەستبەسەراگرتنی موڵک و ماڵە گواستراوە و نەگواستراوەکانی، لەلایەن دادگاوە بۆ دەرکراوە.