عێراق 600 مێگاوات کارەبا لە تورکیاوە هاوردە دەکات

ئاڤا نیوز

تورکیا بەتوانای 600 مێگاوات پاڵپشتی لەسیستمی کارەبای عێراق دەکات، سەرچاوەیەکیش لە بەڕێوەبەرایەتی کارەبای باکوور دەڵێت" ئەو هێڵە بەفەرمی کەوتە بواری خزمەتەوە" .

چیرۆکی سەرەکی: پێشتر عێراق بڕی 300 مێگاوات کارەبای لە تورکیاوە هاوردە دەکرد، بەڵام لەمانگی نیسانی ڕابردووەوە ئەنقەڕە ئەو بڕە کارەبایەی ڕاگرت و لەگەڵ وەزارەتی کارەبای عێراق لێتێگەیشتنێکی نوێی بۆ زیادکردنی بڕەکەی بۆ 600 مێگاوات واژۆ کرد .

لێدوانی فەرمی: سەرچاوەیەک لەبەڕێوەبەرایەتی کارەبای باکوور ڕاگەیاند: بۆ پاڵپشتی لە دابینکردنی وزەی کارەبا بۆ پارێزگاکانی نەینەوا، کەرکووک، سەڵاحەددین و بەشێکی دیالە، ئەو هێڵەی عێراق و تورکیا بەیەکەوە دەبەستێتەوە کەوتە خزمەتەوە.

ژماره‌كان واده‌ڵین: سەرچاوەکە ئاماژەی بەوەکرد،  لە ئەمڕۆ هەینی 6-6-2025 ـەوە ڕۆژانە بڕی 600 مێگاوات کارەبا لە تورکیاوە هاوردە دەکرێت، ئەمەش ڕۆڵێکی بەرچاوی دەبێت لە کەمکردنەوەی فشارەکان لەسەر تۆڕی کارەبای ناوخۆیی، بەتایبەتی لەگەڵ زیادبوونی خواستی هاووڵاتییان لە وەرزی هاویندا .

ئەوەی پێویستە بیزانیت:  قەیرانی نەبوونی كارەبا یەكێكە لە كێشە گەورەكان كە لە دوای پڕۆسەی ئازادكردنی عێراقەوە بەرۆكی عێراقییەكانی گرتووە و تائێستاش چارەسەر نەكراوە.