شارەزایەکی ئابووری: تورکیا دروشمی "نەوت بەرامبەر ئاو" دەگۆڕێت بۆ "هەناردەکردن بەرامبەر ئاو"

ئاڤا نیوز

شارەزایەکی ئابووری باس لە پلانێکی تورکیا بەرامبەر بە عێراق دەکات و بە "هەڕەشەیەکی مەترسیدار" بۆ سەر کشتوکاڵ و سامانی ئاژەڵ و پیشەسازییە ناوخۆییەکانی دەزانێت و داوا دەکات حکومەتی عێراق لەوبارەیەوە ڕوونکردنەوە بدات.

 

وێنە گەورەکە: سەرۆکی ژووری بازرگانیی ئەنقەرە ئاشکرای کردووە، ئامانجێکی هاوبەش لەنێوان حکومەتەکانی عێراق و تورکیادا هەیە بۆ بەرزکردنەوەی قەبارەی ئاڵوگۆڕی بازرگانیی نێوانیان بۆ 30 ملیار دۆلار، بە جۆرێک کە هەناردەی تورکیا بۆ عێراق زیاتر لە 90٪ـی ئەم بڕە پێکبهێنێت.

 

لێدوانی فەرمی: مەنار عوبەیدی، سەرۆکی دامەزراوەی عێراقی ئاییندە بۆ توێژینەوە و ڕاوێژی ئابووری بە ئاڤا میدیای ڕاگەیاند: هەرچەندە ئەم لێدوانەی سەرۆکی ژووری بازرگانیی تورکیا هیچ وردەکارییەکی لەبارەی کات و شوێنی ڕێککەوتنەکە لەخۆ نەگرتووە، یان ئەو لایەنە عێراقییەی کە بەشداریی لە دیاریکردنی ئەم ئامانجەدا کردووە، بەڵام ئاماژەکان ئەوە دەردەخەن کە تورکیا بازاڕی عێراقی وەک شوێنێکی ستراتیژی بۆ ساغکردنەوەی بەرهەمەکانی سەیر دەکات.

 

ئەوەی پێشبینی دەکرێت: بە گوتەی عوبەیدی، ڕەنگە تورکیا بەمە کار لەسەر سنووردارکردنی هەر هەوڵێکی نیشتمانیی عێراقی بکات بۆ پشتگیریکردنی بەرهەمی ناوخۆیی یان پەرەپێدانی کەرتەکانی کشتوکاڵ و پیشەسازی.

 

ئەوەی پێشبینی دەكرێت: لەم ڕوانگەیەوە، دروشمە کۆنەکەی "نەوت بەرامبەر ئاو" کە ساڵانێکە دەیبیستین، دەگۆڕێت بۆ واقیعێکی نوێ بە ناونیشانی "هاوردەکردن بەرامبەر ئاو". واتە، هەرچەندە هاوردەی عێراق لە کاڵا تورکییەکان زیاتر بێت، لەوانەیە دەرفەتی بەدەستهێنانی بەردانەوەی ئاو لە تورکیاوە زیاتر بێت. ئەم هاوکێشەیەش هەڕەشەیەکی مەترسیداری بۆ سەر کشتوکاڵ و سامانی ئاژەڵ و پیشەسازییە ناوخۆییەکان لەخۆگرتووە، چونکە ئابووریی عێراق بەند دەکات بە ویستی لایەنێکی دەرەکییەوە.

 

كاریگەریی و لێكەوتەكان: بەم شێوەیە، عێراق خۆی لە بەردەم دوو هەڵبژاردەدا دەبینێتەوە کە خۆشترینیان تاڵە: یان وازهێنان لە بەشێک لە مافە ئاوییەکانی، کە کارێکی ئەستەمە، یان بەردەوامبوون لە هاوردەکردنی کاڵای تورکی بە ڕێژەیەک کە لەوانەیە بگاتە 30 ملیار دۆلاری ساڵانە، بەو هیوایەی لە بەرامبەردا لایەنی تورکی ئاو زیاتر بەربداتەوە.

 

مەترسییە پێشبینكراوەكان: ئەو شارەزا ئابوورییە هیواخوازە حکومەتی عێراق دەستپێشخەری بکات بۆ ڕەتکردنەوەی ئەو قسانەی لە لێدوانەکەی سەرۆکی ژووری بازرگانیی ئەنقەرەدا هاتووە، یان ڕوونکردنەوەیەکی فەرمی بڵاوبکاتەوە کە وردەکارییەکانی ئەم "ڕێککەوتنە" – ئەگەر هەبێت – و چۆنیەتیی دروستکردنی هاوسەنگییەکی بازرگانی کە بەرژەوەندییەکانی عێراق بپارێزێت، بخاتەڕوو، نەک زیان بە کەرتە بەرهەمهێنەرەکان و سەربەخۆیی ئابوورییەکەی بگەیێنێت.