وەزارەتی بەرگری پاککردنەوەی دۆڵی زغێتونی لە گرووپە تیرۆرستییەکان ڕاگەیاند

ئاڤا نیوز

وەزارەتی بەرگریی عێراق، پاککردنەوەی تەواوەتی دۆڵی زغێتونی لە سنووری ئۆپەراسیۆنەکانی کەرکووک، لە چەتە تیرۆرستییەکان ڕاگەیاند.

ئەوەی پێویستە بیزانیت: دۆڵی زغێتون لە نێوان پارێزگای کەرکووک و سەڵاحەدین لە ماوەی 20 ساڵی ڕابردوودا ببووە پەناگەیەک بۆ شانە نوستووەکانی ڕێکخراوی داعش و پاشماوەکانی ئەو ڕێکخراوە کە لێیەوە هێرشیان دەکردە سەر هێزە ئەمنییەکانی عێراق و خەڵکی سڤیلی ئەو ناوچانە.

ڕاگەیێنراوی فەرمی: بەگوێرەی ڕاگەیێنراوی وەزارەتی بەرگریی عێراق هێزە ئەمنییەکان لە چوارچێوەی فەرماندەیی فیرقەی پیادەی یازدەیەم، بەردەوامن لە کارەکانی پاککردنەوە و ڕاماڵینی دۆڵی زغێتون و گۆڕینی ڕێڕەوی ئاوەکە بۆ کەناڵێکی ڕێکخراو، لەگەڵ پڕکردنەوەی ناوچە قامیشڵانەکان کە پەناگەیەک بوون بۆ تیرۆرستان.

ئاماژەی بەوەشداوە، تیمی ئەندازیاریی فیرقەکە توانیویەتی چەندین سەنگەری نموونەیی دروست بکات، بەم هەوڵە دۆڵەکە دوای بیست ساڵ لە بەکارهێنانی لەلایەن گرووپە تیرۆرستییەکانەوە، بەتەواوەتی کەوتە ژێر کۆنترۆڵی سوپای عێراق.