باڵی گردەکە داوای سڕکردنی چالاكییەكانی گۆڕان دەکات

ئاڤا نیوز

لە نوسراوێکدا کە ئاڕاستەی کۆمیسیۆنی باڵای سەربەخۆی هەڵبژاردنەکانی عێراقی کردووە، نوێنەری باڵی گردەکەی گۆڕان داوا لە کۆمیسیۆن دەکات چالاكییەكانی بزووتنەوەکەیان سڕبکرێت.

وێنە گەورەکە: بەهۆی ناکۆکی قووڵی نێوان هەردوو باڵی مەکۆی سەرەکی (گردەکە) و گەڕەکی کوردساتی گۆڕان، سەرەڕای بڕیار و داواکارییەکانی کۆمیسیۆن، بەڵام بزووتنەوەی گۆڕان بۆ چەندینجار نەیتوانی کۆنگرە ببەستێت، بەگوێرەی یاسای حیزبەکانیش هەموو حزبێک دەتوانێت داوای سڕکردنی چالاکییەکانی یان خۆهەڵوەشاندنەوەی بکات.

نوسراوی فەرمی: یاسین حەمە عەلی، ڕێگەپێدراوی باڵی گردەکەی گۆڕان ڕۆژی 17ـی ئەم مانگە نوسراوێکی ئاڕاستەی کۆمیسیۆن کردووە و تێیدا داوایکردووە تا لابردنی ئاستەنگییەکان و دروستبوونی لێکتێگەیشتنی ناوخۆ بۆ بەستنی کۆنگرە، بەگوێرەی بڕگەی یەکەم ماددەی 31 لە  یاسای حیزبەکان، چالاکییە سیاسییەکان بەناوی گۆڕانەوە ڕابگیرێت.

ئەو مانایەی دەیگەیێنێت: نوسراوەکە لەلایەن باڵی گردەکەوە بۆ کۆمیسیۆن نێردراوە، ئەوەش مانای وایە باڵی گەڕەکی کوردسات دژی ئەم ڕێکارەیە بەتایبەتیش کە ئێستا ئەوان ڕێکخەرییان هەیە و میدیای گۆڕانیش چالاکییەکانیان ڕووماڵ دەکات، بۆیە لەگەڵ سڕکردنی چالاکییە سیاسییەکان نین کە واتای سڕکردنی بزووتنەوەکەش دەگەیێنێت.