یەکێتیی قوتابیان و لاوان هەڵمەتێک بۆ بەرەنگاربوونەوەی ماددە هۆشبەرەکان ڕادەگەیێنن

ئاڤا نیوز

بە مەبەستی بەرەنگاربوونەوەی مەترسییەکانی ماددە هۆشبەرەکان، هەڵمەتێکی سەرتاسەری ڕادەگەیێنرێت بۆ کەمکردنەوەی هەڕەشەکانی ماددە هۆشبەرەکان لەسەر کۆمەڵگەی کوردستان.

چیرۆکی سەرەکی: ئەمڕۆ 26ی حوزەیران، کە هاوکاتە لەگەڵ ڕۆژی جیهانیی بەرەنگاربوونەوەی ماددە هۆشبەرەکان، مەکتەبی سکرتاریەتی یەکێتیی قوتابیان و لاوانی دیموکراتی کوردستان، قۆناغی یەکەمی هەڵمەتی ڕووبەڕووبوونەوەی ماددە هۆشبەرەکانی دەستپێکرد. هەڵمەتەکە بە بڵاوکردنەوەی سەدان هەزار پڕۆشەر و ئاگانامە لە سەرجەم شار و شارۆچکەکانی هەرێمی کوردستان بەڕێوەچوو.

لێدوانی فەرمی: شنیا هۆشیار، ئەندامی مەکتەبی سکرتاریەتی یەکێتیی قوتابیان و لاوانی دیموکراتی کوردستان، لە لێدوانێکدا بۆ ئاڤا میدیا ڕایگەیاند: ئەمە تەنها قۆناغی یەکەمی هەڵمەتەکەیە و بڕیارە سەدان هەزار پڕۆشەر لە سەرتاسەری کوردستان بڵاوبکەینەوە. لە قۆناغەکانی داهاتوودا چەندین سیمینار و پانێڵی تایبەتمان دەبێت بۆ زیاتر قسەکردن لەسەر ئەم پرسە گرنگە و دۆزینەوەی ڕێگەچارەی بنەڕەتی.

- ئەم هەڵمەتە فراوانە بە ئامانجی هۆشیارکردنەوەی قوتابیان و لاوانە لە مەترسییەکانی ماددە هۆشبەرەکان. پڕۆشەرەکان زانیاریی ورد لەبارەی زیانە کوشندەکانی ئەم دیاردەیە و ڕێگاکانی چارەسەر و خۆپارێزی لەخۆدەگرن.

- لەم چوارچێوەیەدا، لقی هەڵەبجەی یەکێتیی قوتابیان و لاوانی دیموکرات، وەک بەشێک لە هەڵمەتەکە، لە شوێنە گشتییەکانی سنووری پارێزگای هەڵەبجەدا چالاکییان ئەنجامدا و پڕۆشەرەکانیان بەسەر هاووڵاتییاندا دابەشکرد.

ئەوەی پێویستە بیزانیت: هەڵمەتەکە وەک هەنگاوێکی کردەیی دێت بۆ کەمکردنەوەی هەڕەشەکانی ماددە هۆشبەرەکان لەسەر کۆمەڵگەی کوردستان و پاراستنی توێژی گەنج لەو مەترسییە گەورەیە.