پرۆژەیەكی گەورەی گەشتیاری لە ئامێدی بەرەو تەواوبوون دەچێت

ئاڤا نیوز

پرۆژەی ڕێگەی كەمەرەیی چواردەوری ئامێدی و قوتابخانەی قوبەهان كە ڕێگەیەكی پیادەی گەشتیارییە لە ئامێدی، بەرەو تەواوبوون دەچێت.

وێنە گەورەكە: لە چوارچێوەی جێبەجێكردنی پرۆژە خزمەتگوزارییەكانی حكومەتی هەرێمی كوردستان بۆ پەرەپێدانی سێكتەری گەشتیاری، پرۆژەی ڕێگەی پیادەی كەمەرەیی شارۆچكەی ئامێدی لە بناری چیای مەتین جێبەجێ دەكرێت كە درێژییەكەی دووهەزار و 985 مەترە، ئەو ڕێگەیەشی كە دەچێتە قوتابخانەی قوبەهان، 719 مەترە و پانییەكەی چوار مەترە، گوژمەی سێ ملیار دیناری بۆ تەرخانكراوە و كارەكانی پرۆژەكە بە خێرایی دەكرێت.

لێدوانی فەرمی: گارە حاجی، ئەندازیاری كۆمپانیای جێبەجێكاری پرۆژەكە تایبەت بە ئاڤا ڕایگەیاند، ڕێگەی كەمەرەیی پیادەی ئامێدی، پرۆژەیەكی گەشتیاری و شوێنەوارییە كە بە گوژمەی 3 ملیار دینار لەسەر بودجەی پارێزگای دهۆك جێبەجێ دەكرێت، پرۆژەكە 65%ـی کارەکانی تەواو بووە و لە ناوەڕاستی مانگی تشرینی یەکەمی ئەمساڵدا دەچێتە خزمەت هاووڵاتیان و گەشتیاران.

ئاماژەی بەوەشكرد، بە تەواوبوونی پرۆژەكە، ژمارەیەكی زیاتری گەشتیاران بەرەو هاوینەهەوارەكانی دەڤەری ئامێدی ڕادەكێشێت.