لە سنووری شەقڵاوە و هیران زەوی بەسەر فەرمانبەراندا دابەش دەکرێت

ئاڤا نیوز

لەم هەفتەیە سنووری دوو شارەوانی دیکە تیروپشکی دابەشکردنی زەوییان بۆ دەکرێت کە قەزای شەقڵاوە و هیران لەخۆدەگرێت، لە ئایندەیەکی نزیکدا لە سنووری شارەوانی کۆیەش زەوی دابەش دەکرێت.

چیرۆکی سەرەکی: زیاتر لە 35 هەزار پارچە زەوی لە سنووری بەڕێوەبەرایەتی گشتیی شارەوانییەکانی هەولێر دابەشکراوە، نزیکەی 10 هەزار کەس ماون کە زەوییان بەسەردا دابەش بکرێت، بەشێکی زۆرییان لە سنووری قەزاکانی کۆیە و هەریرن.

لێدوانی فەرمی: مەریوان حاکم هادی، بەڕێوەبەری گشتیی شارەوانییەکانی هەولێر بە ئاڤای گوت: "نزیکەی سێ هەزار پارچە زەوی لە سنووری شەقڵاوە و هیران ئامادەکراوەن، بڕیارە لە کۆتایی ئەم هەفتەیە تیروپشک بۆ دابەشکردنیان بکەین."

بەڕێوەبەری گشتیی شارەوانییەکانی هەولێر، گوتیشی: "لە سنووری قەزای کۆیە شەش هەزار پارچە زەوی ئامادەکراوە و هەندێک ڕێککاری کارگێڕی ماون، دوای تەواوبوونی ئەو ڕێککارانە تیروپشک بۆ دابەشکردنی زەوییەکانی ئەو سنوورەش دەکرێت."

ئەوەی پێویستە بیزانیت: بۆ ماوەی چەندین ساڵ، دابەشکردنی زەوی ڕاگیرا بوو، کابینەی نۆیەمی حکومەتی هەرێمی کوردستان بڕیاریدا هەر فەرمانبەرێک ئەگەر مەرجەکانی پێدانی زەوی هەبێت، 200 مەتر زەوی پێبدرێت.