هەنگاوە کردەییەکان بۆ یەکخستنی دامەزراوەکان لە حەسەکە و کۆبانی بەردەوامە

ئاڤا نیوز

بەڕێوەبەرایەتیی خۆسەر و حکومەتی سووریا جێبەجێکردنی بڕگەکانی ڕێککەوتنی 30ـی کانوونی دووەمیان خێرا کردووە، کە بە پڕۆسەی جێگیرکردنی هێزە ئەمنییەکان و دەستبەکاربوونی پارێزگار و یەکخستنی دامەزراوە سەربازییەکان دەستیپێکردووە.

زانیاریی بەدەستهاتوو: بەگوێرەی ڕاپۆرتێکی مەیدانی و زانیارییەکانی سەرچاوە ناوخۆییەکانی ڕۆژئاوای کوردستان، هێزە ئەمنییەکانی حکومەت لە حەسەکە و قامیشلۆ و گوندەوارەکانی کۆبانی جێگیر بوون، هاوکات فەرماندە سەربازییەکان بۆ پێکهێنانی سێ لیوای نوێی هاوبەش کۆبوونەوە.

- نورەدین عیسا وەک پارێزگاری نوێی حەسەکە دەستبەکاربوو، کە ئەمەش وەک هەنگاوێکی سەرەکی بۆ ڕێکخستنەوەی تەواوی دامەزراوە فەرمییەکان و گەڕانەوەی سەقامگیری بۆ ناوچەکە دەبینرێت.

لەلایەکی دیکە: شاندێکی ئیدارەی خۆسەر لە حەلەب لەگەڵ بەرپرسان کۆبوونەوە تاوەکوو میکانیزمی یەکخستنی فەرمانگە مەدەنییەکان و دابینکردنی مافە زمانی و پەروەردەییەکانی کورد بە فەرمی تاوتوێ بکەن.

- سەرەڕای ئەم پێشەوچوونانە، هێشتا پرسی گەمارۆی سەر کۆبانی وەک ئاڵنگارییەک ماوەتەوە و لایەنەکان هەوڵدەدەن لە ڕێگەی دانوستانەوە چارەسەرێکی گونجاو بۆ تەواوی کێشەکان بدۆزنەوە.

باکگراوند: لە 30ی کانوونی دووەمی ڕابردوودا، ڕێککەوتنێکی گشتگیر لە نێوان هێزەکانی سوریای دیموکرات (هەسەدە) و حکومەتی سووریا ڕاگەیێنرا. بەپێی ڕێککەوتنەکە، هەردوولا بڕیاریان داوە شەڕ ڕابگرن و قۆناغ بە قۆناغ هێزە سەربازی و دامەزراوە کارگێڕییەکانیان یەکبخەن.