لە کاتی گواستنەوەیاندا چەکدارانی داعش هەڕەشەی کوشتن لە پاسەوانانی عێراق دەکەن

ئاڤا نیوز

عێراق ژمارەیەکی دیکەی زیندانیانی داعشی لە سووریا وەرگرتەوە، بەشێک لە زیندانییەکان لە کاتی گواستنەوەدا هەڕەشەی کوشتنیان لە هێزە ئەمنییە عێراقییەکان کردووە.

ڕاگەیێنراوی فەرمی: شانەی ڕاگەیاندنی ئەمنی عێراق، لە ڕاگەیێنراوێکدا دەڵێت: "دوو هەزار و 250 چەکداری داعش بە هەماهەنگی لەگەڵ هاوپەیمانی نێودەوڵەتی لە سووریاوە گوازراونەتەوە و لە ناوەندە تووندوتۆڵەکاندا بۆ ڕێگری لە مەترسییەکان بەندکراون."

لەلایەکی دیکەوە: بەگوێرەی ڕاپۆرتێکی ڕۆژنامەی شەرقولئەوسەت، لەسەر زاری سەرچاوە ئەمنییەکانەوە، "چەکداران لە کاتی گواستنەوەیاندا بە دەست و پێ بەستراوی هاواریان کردووە، "دەڕۆین و دەتانکوژین،"

ئەوەی پێویستە بیزانیت: زۆربەی زیندانییەکان لە بەغدا و حلە جێگیر کراون، فەرمانی تووندیش دراوە کە پاسەوانان هیچ جۆرە گفتوگۆیەک لەگەڵیاندا نەکەن تاوەکو ڕێگری لە هەر جۆرە پشێوی یان دزەکردنێکی ئەمنی بگیریێت. هاوکات ئەنجوومەنی باڵای دادوەری دەستی بە لێکۆڵینەوە لەگەڵ هەزار و 387 زیندانی داعش کردووە، تاوەکو بەپێی یاسا تووندەکانی بەرەنگاربوونەوەی تیرۆر دادگایی بکرێن و سەرجەم تاوانباران سزای دادپەروەرانەی خۆیان لە ناوخۆی وڵاتدا وەربگرن.

باکگراوند: گواستنەوەی زیندانیانی داعش لە سووریاوە بۆ عێراق لە چوارچێوەی ڕێککەوتنی ئەمنی نێوان هەسەدە و حکومەتی سووریایە کە ئەمریکا ڕاستەوخۆ سەرپەرشتی پرۆسەیە دەکات، ئەم گۆڕانکارییانەش دوای ئەوە دێت کە هێزەکانی هەسەدە لە کەمپی "هۆل" پاشەکشەیان کرد و سوپای سووریا کۆنترۆڵی کەمپەکە و دەوروبەری گرتە دەست.