بۆ دووەم ساڵ لەسەر یەک ئاڤا وەک پڕبینەرترین میدیا هەڵبژێردرا

ئاڤا نیوز

بەگوێرەی ڕاپرسییەکی ڕاما ئەجێنسی، بۆ دووەم وەرز ئاڤا میدیا وەک پڕبینەرترین کەناڵی ئاستی هەرێمی کوردستانە، بۆ چوارەم وەرزیش ئاڤای وەرزشی پڕ بینەرترین کەناڵە.

د.هەژار بلباس، بەڕێوەبەری داتا و ڕاپرسی لە ڕاما ئاژانسی ڕایگەیاند، لە ڕاپرسیەکە بواری هەواڵ بە بنەما وەرگیراوە. هەواڵەکانی ئاڤا زۆرترین بینەریان هەیە. لە دوایین ڕاپرسیدا پێنج هەزار فۆڕم لە 13 شار و شارۆچکە و گوندی هەرێمی کوردستان دابەش کراون.

ڕێوڕەسمی ڕاگەیاندنی باشترینەکان لەسەر ئاستی کوردستان لە ئیدارەی سەربەخۆی سۆران بەڕێوەچوو، ڕاپرسییەکانی ڕاما ئەجێنسی شەش مانگ جارێک دەکرێت، واتا بەپێی وەرزەکان ڕاپرسییەکان دەکرێن، لە شەش مانگی ڕابردوودا بەپێی ئەو ڕاپرسییەی کە کراوە و بڵاوکرایەوە، ئاڤا میدیا باشترین میدیای کوردستانە. 

ڕاما ئاژانسی، دامەزراوەیەکی ئەکادیمی زانستی نا حکومییە، لەماوەی چوار ساڵی ڕابردوو چەندین ڕاپرسی ئەنجامداوە.

ئەمە جیا لەوەی لە شەش مانگی پێشووتریشدا واتا لە شەش مانگی یەکەمی ساڵی ڕابردووشدا ئاڤا یەکەم بووە و سێ خەڵاتی لە ڕاپرسییەکاندا بردەوە وەک باشترین کەناڵ بۆ هەواڵ، باشترین بەرنامە و باشترین کەناڵی وەرزشی کە ئاڤا سپۆرت بوو.

ئاڤا سپۆرتیش کە کەناڵێکی ناوخۆییە، چوارەم وەرزە لەسەریەک واتا لەوەتەی دەستی بە پەخش کردووە تاوەکوو ئێستا پڕبینەرترین کەناڵی وەرزشیی ناوخۆیی لەسەر ئاستی کوردستانە، هەروەها خاڵاتی باشترین کەناڵی ناوخۆییشی بەدەستهێنا، واتا ئاڤا میدیا سێ خەڵاتی لەلایەن ڕاما ئەیجێنسییەوە بە دەنگی خەڵک بردەوە.

ڕاپرسییەکە لە ڕۆژی 1-1-2026 تاوەکوو 10-1-2026 بووە، ڕووداوەکانی ڕۆژئاوای کوردستان و هەڵوێست و ڕووماڵە نیشتمانپەروەرییەکانی ئاڤا میدیا لەو ماوەیەدا جارێكی دیکە سەلماندییەوە کە پڕبینەرترین میدیای کوردییە.