کاریگەریی شەپۆلی بارانبارین تا هەفتەی داهاتوو بەردەوام دەبێت

ئاڤا نیوز

بەڕێوەبەرایەتی گشتیی کەشناسی و بوومەلەرزەزانیی هەرێمی کوردستان ڕایگەیاند، ئەمڕۆ یەکشەممە، ئاسمانی هەرێمی کوردستان بە گشتی هەور دەبێت، باران بەشێوەی نمە باران و بارانی مامناوەند لەسەرجەم ناوچەکان بەردەوام دەبێت.

 لەگەڵ بوونی تەمومژ و بەفربارینێکی کەم لەسەر لوتکەی شاخە بەرزەکان و ناوچە سنوورییەکان.

ڕاگەیێنراوی فەرمی: بەپێی پێشبینییەکانی کەشناسی هەرێمی کوردستان کە ئەمڕۆ بڵاویکردووەتەوە، سبەى دوو شەممە، کاریگەریی شەپۆلی بارانبارین زیاد دەکات و لە تەواوی ناوچەکانی هەرێمی کوردستان باران دەبارێت.

بەگوێرەی ڕاگەیێنراوی کەشناسی هەرێم، ڕێژەی دابارین لە سنووری ئیدارە سەربەخۆکانی سۆران، ڕاپەڕین و زاخۆ زیاتر دەبێت، هاوکات لە سەنتەری پارێزگاکانی هەولێر، سلێمانی، کەرکووک و هەڵەبجە، باران لەسەر خۆ و نمە بارانی پچڕ پچڕ دەبێت، بەڵام لە سەنتەری پارێزگای دهۆک ئەگەری بارانبارینی بە لێزمە هەیە، لەگەڵ بەفربارین لە ناوچە سنوورییە شاخاوییەکان.

لێدوانی فەرمی: شێخ دارا حەسەن، شارەزای کەشناسی و پێشکەشکاری کەشوهەوا لە ئاڤا میدیا دەڵێت: "کاریگەریی ئەم شەپۆلەی بارانبارین تاوەکو ڕۆژی شەممەی داهاتوو بەشێوەی جیاجیا بەردەوامی دەبێت."

زانیاریی زیاتر: بڕی بارانبارینی 24 کاتژمێری ڕابردوو، لە کاتژمێر 9ـی بەیانیی دوێنێ شەممە 7-2-2026 تاوەکو کاتژمێر 9ـی بەیانیی ئەمڕۆ یەکشەممە 8-2-2026 بەمشێوەی خوارەوە بووە:

٠ هەولێر: 17.7 ملم
٠ سلێمانی: 18.9 ملم
٠ دهۆک: 32.7 ملم
٠ هەڵەبجە: 28.5 ملم
٠ کەرکووک: 1.2 ملم
٠ سۆران: 44.2 ملم
٠ ڕانیە: 40.5 ملم
٠ زاخۆ: 47.2 ملم
٠ کەلار: 5.6 ملم