تەڵەبات و کۆمپانیاکانی دیکەی دیلیڤەری لەبەردەم مەترسی داخستندان

ئاڤا نیوز

وەزارەتی ناوخۆی هەرێمی کوردستان هۆشدارییەکی توند ئاڕاستەی سەرجەم کۆمپانیاکانی گەیاندن (دیلیڤەری)، بەتایبەتی کۆمپانیای "تەڵەبات" دەکات و  تا کۆتایی ئەم مانگە مۆڵەتیان پێدەدات بۆ تۆمارکردنی سەرجەم ئەو ماتۆڕسکیلانەی لە کارەکانیاندا بەکاریان دەهێنن.

 

لێدوانی فەرمی: هێمن میرانی، بەڕێوەبەری گشتیی دیوانی وەزارەتی ناوخۆی هەرێمی کوردستان، ڕایگەیاند: "بڕیار بوو لەم مانگەدا کۆمپانیای تەڵەبات سەرجەم ماتۆڕەکانیان تۆمار بکەن. ئێمە چاوەڕێی داتاکانیانین و تا کۆتایی ئەم مانگەش دەرفەتیان لەپێشە، بە پێچەوانەوە بەم نزیکانە کۆمپانیاکە دادەخرێت."

ناوبراو جەختی لەوەش کردەوە ئەم بڕیارە تەنها تایبەت نییە بە "تەڵەبات" و سەرجەم ئەو کۆمپانیایانە دەگرێتەوە کە لە بواری دیلیڤەریدا کاردەکەن. ئەم هەنگاوە بە مەبەستی ڕێکخستنەوەی کەرتی گەیاندن و زیادکردنی سەلامەتی لەسەر شەقامەکان دێت.

بۆچوونی لایەنی بەرامبەر: سەرچاوەیەک لە کۆمپانیای تەڵەباتەوە بە ئاڤای ڕاگەیاند، ئەوان پابەندی ڕێنماییەکانی وەزارەتی ناوخۆ دەبن و لێکتێگەیشتنێکی باش لە نێوانیاندا هەیە بۆ جێبەجێکردنی بڕیارەکە لە زووترین کاتدا.