چاوەڕوان دەکرێت ئەنجوومەنی وەزیرانی عێراق پرسی مووچەی فەرمانبەرانی کوردستان باس بکات

ئاڤا نیوز


چاوەڕوان دەکرێت لە کۆبوونەوەی ئەمڕۆی ئەنجوومەنی وەزیرانی عێراق، پرسی داهاتی ناوخۆی هەرێمی کوردستان و دووبارە هەناردەکردنەوەی نەوت تاوتوێ بکرێت. 


چیرۆکی سەرەکی: لە کۆبوونەوەی هەردوو وەزارەتی دارایی حکومەتی هەرێمی کوردستان و حکومەتی عێراق، کە ڕۆژەی پێنجشەممە 7/8/2025 لە دیوانی چاودێری دارایی لە بەغدا بەڕێوەچوو، هەردوو وەزارەت یاداشتێکیان ئامادە کردووە، بۆ ئەوەی لە کۆبوونەوەی ئەنجوومەنی وەزیرانی عێراق گفتوگۆی لەبارەوە بکرێت.

زانیاریی پەیامنێر: دەروون مەلا ناجی پەیامنێری ئاڤا لە بەغدا گوتی: پێشبینی دەکرێت لە پەراوێزی کۆبوونەوەی ئەمڕۆی ئەنجوومەنی وەزیرانی عێراق باس لەو بابەتانە بکرێت کە پەیوەستن بە مووچە، ئەوانیش پرسی داهاتی ناوخۆ و هەناردەکردنەوەی نەوتی هەرێمی کوردستانە، پێشبینی دەکرێت بەپێی کۆبوونەوەکە بڕیار لەبارەی مووچەی مووچەخۆرانی هەرێمی کوردستان بدرێت.

کۆکردنەوەی داهاتی ناوخۆ و ڕادەستکردنی بە حکومەتی عێراق خاڵی ناکۆکی زۆری لەسەرە و هەردوو وەزارەتی دارایی حکومەتی هەرێمی کوردستان و حکومەتی عێراق سەرنج و تێبینیەکانیان بۆ ئەنجوومەنی وەزیران ناردووە و لە کۆبوونەوەی ئەمڕۆ گفتوگۆی لەبارەوە دەکرێت.

لێدوانی فەرمی: ڕێباز حەملان، یاریدەدەری سەرۆک وەزیرانی هەرێمی کوردستان دوێنێ لە کۆنگرەیەکی ڕۆژنامەوانیدا گوتی، لەسەر پرسی نەوت لەگەڵ حکومەتی عێراق ڕێککەوتووین، بەڵام داهاتی ناوخۆ بووەتە کێشە، عێراق داوی 50%ی کۆی داهاتی ناوخۆ دەکات، ئەوەش پێچەوانەی یاسای ئیدارەی مالی، یاسای بودجەیە، چونکە یاسا دیاری کردووە تەنیا لە 50%ی داهاتی باج و گومرگ بۆ عێراق ڕوانە بکرێت نەک ڕسوماتی وەزارەتەکان.

زانیاریی زیاتر: لە کارنامەی کۆبوونەوەی ئەمڕۆی ئەنجوومەنی عێراق پرسی داهاتی ناوخۆ و هەناردە کردنەوەی نەوتی هەرێمی کوردستان نەهاتووە، بەڵام چاوەڕێ دەکرێت لە پەراوێزی کۆبوونەوەکەدا ئەو بابەتە گفتوگۆی لەبارەوە بکرێت.