ئیلهام ئەحمەد: جێگیرکردنی ئاگربەست بەردی بناغەی جێبەجێکردنی ڕێککەوتنی 18ـی کانوونی دووەمە

ئاڤا نیوز

بەرپرسی پەیوەندییەکانی دەرەوەی بەڕێوەبەرایەتیی خۆسەری ڕۆژئاوای کوردستان ڕادەگەیەنێت، چەسپاندنی ئاگربەست و ڕاگەیاندنی کۆتاییهاتنی کردەوە سەربازییەکان، بەردی بناغەی جێبەجێکردنی ڕێککەوتنی 18ـی کانوونی دووەمە.

چیرۆکی سەرەکی: سێشەممەی ڕابردوو 20ـی کانوونی دووەم، وەزارەتی بەرگریی سووریا ئاگربەستێکی چوار ڕۆژەی ڕاگەیاند و هەسەدەش پابەندبوونی خۆی بە ئاگربەستەکە ڕاگەیاند؛ کاتژمێر 8ـی ئێوارەی ئەمڕۆ شەممە وادەی ئاگربەستەکە تەواو دەبێت.

لێدوانی فەرمی: ئیلهام ئەحمەد، بەرپرسی پەیوەندییەکانی دەرەوەی بەڕێوەبەرایەتیی خۆسەری ڕۆژئاوای کوردستان لە پەیامێکدا لە هەژماری فەرمیی خۆی لە تۆڕی ئێکس نووسیویەتی: "چەسپاندنی ئاگربەست و ڕاگەیاندنی کۆتاییهێنان بە کردەوە سەربازییەکان، بەردی بناغەی جێبەجێکردنی ڕێککەوتنی ڕاگەیەندراوی 18ـی کانوونی دووەمە."

ئیلهام ئەحمەد لە پەیامەکەیدا ڕوونی کردووەتەوە، لە چەند ڕۆژی ڕابردوودا بەهۆی پێکدادانەکانەوە شەپۆلێکی فراوانی کۆچکردن لە گوند و شارۆچکەکان ڕووی داوە، کە بووەتە هۆی تێکچوونی ژیانی هاووڵاتییانی سڤیل و ڕاوەستانی خوێندن لەم زستانە سەختەدا.

بەرپرسی پەیوەندییەکانی دەرەوەی بەڕێوەبەرایەتیی خۆسەر دەڵێت: "ئێمە لە کارەکانمان بەردەوامین و دەستپێشخەری دەکەین بۆ کۆتاییهێنان بەم جەنگە؛ لێرەشدا جێی خۆیەتی سوپاسی هەموو ئەو هەوڵە ناوخۆیی و نێودەوڵەتییانە بکەین کە دەدرێن."