ئەمریکا گوشارەکانی بۆ داماڵینی چەکی گرووپەکان لە عێراق تووند دەکاتەوە

ئاڤا نیوز

واشنتن داوای پلانێکی خێرا بۆ داماڵینی چەکی گرووپە چەکدارەکان لە عێراق دەکات و هەڕەشەی بەکارهێنانی "کارتی دۆلار" دەکات دژی بەغدا ئەگەر داواکارییەکانی جێبەجێ نەکرێن.

وێنە گەورەکە: واشنتن داوای پێکهێنانی حکومەتێکی نوێ دەکات کە ئەو گرووپانە لەخۆ نەگرێت، ئەمەش وەک هەوڵێکی ئیدارەی دۆناڵد ترەمپ بۆ سنووردارکردنی هەژموونی تاران لە بەغدا و گۆڕینی هاوسەنگیی هێز لە ناوچەکەدا دەبینرێت.

بڵاوکراوەی ڕۆژنامەوانی: بەپێی ڕاپۆرتێکی ڕۆژنامەی "فاینانشاڵ تایمز"، بەرپرسانی ئەمریکا لە کۆبوونەوەکانیاندا لەگەڵ سەرکردە باڵاکانی عێراق، داوای دانانی پلانێکی خێرا و "باوەڕپێکراو"یان کردووە بۆ داماڵینی چەکی گرووپە چەکدارەکان و پێکهێنانی حکومەتێکی نوێ کە ئەو لایەنانە لەخۆ نەگرێت.

زانیاریی زیاتر: واشنتن هەڕەشەی کردووە ئەگەر بەغدا ئەم هەنگاوانە نەنێت، ڕەنگە گواستنەوەی پارەی نەختینەی دۆلار سنووردار بکات، کە سەرچاوەی سەرەکیی داهاتی نەوتی عێراقە و لە بانکی فیدراڵیی ئەمریکا کۆدەکرێتەوە. ئەم فشارە نوێیانە ترس و نیگەرانیی زۆری لای بەرپرسانی عێراق دروستکردووە، چونکە هەر ڕاگرتنێکی پارەی دۆلار دەبێتە هۆی داڕمانی بەهای دینار و دروستبوونی پشێویی کۆمەڵایەتیی، هەر بۆیە ئیدارەی ترەمپ دەیەوێت لە کاتی دانوستانی پێکهێنانی کابینەی نوێ، ئەم کارتە بۆ دوورخستنەوەی گرووپە چەکدارەکان لە دەسەڵات بەکاربهێنێت.

باکگراوند: عێراق لە ساڵی 2003ـەوە ساڵانە ملیاران دۆلار لە داهاتی نەوتەکەی لە ڕێگەی گەشتی ئاسمانییەوە لە ئەمریکاوە وەردەگرێت. پێشتریش لە ساڵی 2015ـدا، واشنتن بۆ ماوەیەکی کاتیی ئەم پڕۆسەیەی ڕاگرت تاوەکو دڵنیا بێتەوە پارەکان ناگاتە دەستی ئێران و داعش؛ ئێستاش جارێکی دیکە ئەم دۆسیەیە وەک بەهێزترین کارتی فشار دژ بە هەژموونی تاران لە بەغدا بەکاردەهێنرێتەوە.