وەزارەتی پەروەردە وادەی دەستبەکاربوونەوەی مامۆستایانی دیاری کرد

ئاڤا نیوز

وەزارەتی پەروەردەی حکومەتی هەرێمی کوردستان وادەی دەستبەکاربوونەوەی مامۆستایانی لە ناوەندەکانی خوێندنی حکومی بۆ ساڵی خوێندنی 2025-2026، دیاری کرد.

 

نووسراوی فەرمی: بەگوێرەی گشتاندنێکی وەزارەتی پەروەردەی حکومەتی هەرێمی کوردستان کە ئاراستەی بەڕێوەبەرایەتییە گشتییەکانی پەروەردەی (هەولێر، سلێمانی، دهۆک، هەڵەبجە، گەرمیان، زاخۆ، سۆران، ڕاپەرین و خوێندنی کوردی لە کەرکووک) کردووە، ڕایدەگەیێنێت کە ڕۆژی دووشەممە ڕێکەوتی 1ـی  9ـی 2025 ڕۆژی دەستبەکاربوونەوەی (مباشرة) مامۆستایانی ناوەندەکانی خوێندنی حکومییە.

 

لەهەمان کاتدا: وەزارەتەکە بۆ ئەو مامۆستایانەی کە لە ئەرکی تاقیکردنەوە گشتییەکانی پۆلی 12ـی ئامادەیی خولی دووەمن و لەو ڕۆژەدا لە ئەرکن، هەمان ڕێککەوتنی ئاماژەپێدراویان بۆ دەکرێت بە ڕۆژی دەستبەکاربوونەوە.

 

ئەوەی پێویستە بیزانیت: لەبارەی دیاری کردنی یەکەم ڕۆژی ساڵی نوێی خوێندنیش پێشتر سامان سیوەیلی، وتەبێژی وەزارەتی پەروەردە بە ئاڤا میدیای ڕاگەیاندبوو: بڕیارە لە کۆتایی ئەم مانگە ساڵنامەی خوێندن ئامادە بکرێت کە تەواوی پلانی خوێندن لە وەرزی یەکەم و دووەم، ڕۆژانی پشوو، کاتەکانی تاقیکردنەوە و سەرجەم وردەکارییەکانی ساڵی نوێی خوێندن لەخۆدەگرێت.