وەزارەتی پەروەردە ڕوونکردنەوە لەبارەی یەکەم ڕۆژی دەسپێکی خوێندن دەدات

ئاڤا نیوز

‌وەزارەتی پەروەردە ڕوونکردنەوە لەبارەی یەکەم ڕۆژی ساڵی نوێی خوێندن دەدات، گوتەبێژی وەزارەتی پەروەردەش دووپاتی دەکاتەوە، هێشتا ئەنجوومەنی وەزارەت لەسەر ئەو بابەتە کۆنەبووەتەوە و ڕۆژەکەش دیار نەکراوە.

چیرۆکی سەرەکی: ئەمڕۆ هەواڵێک بڵاوبوەوە دەربارەی کۆبوونەوەی ئەنجوومەنی وەزارەتی پەروەردە و دیار کردنی یەکەم ڕۆژی ساڵی نوێی خوێندن بۆ ساڵی 2025 – 2026، وەزارەتی پەروەردەش ئەو هەواڵە ڕەت دەکاتەوە.

لێدوانی فەرمی: ‎سامان سیوەیلی، وتەبێژی وەزارەتی پەروەردەی هەرێمی کوردستان بە ئاڤای گوت: ئەو هەواڵە ڕاست نیە و ئەمڕۆ ئەنجوومەنی وەزارەت کۆنەبووەتەوە و هێشتا یەکەم ڕۆژی ساڵی نوێی خوێندن دیار نەکراوە.

ئەوەی ئێستا ڕوودەدات: ئێستا پرۆسەی وەرگرتنی قوتابییان لە ناوەندەکانی خوێندن دەکرێت، ئەو پرۆسەیەش تاوەکو 20ی ئەم مانگە بەردەوام دەبێت.

گۆشەیەکی دیکەی دیمەنەکە: لە سنووری سەرجەم پەروەردەکان، ڕێکخستنەوەی میلاکی قوتابخانەکان دەستی پێکردووە و ئامادەکاری بۆ ساڵی نویی خوێندن دەکرێت.

هەنگاوی داهاتوو: بڕیارە لە کۆتایی ئەم مانگە ساڵنامەی خوێندن ئامادە بکرێت کە تەواوی پلانی خوێندن لە وەرزی یەکەم و دووەم، ڕۆژانی پشوو، کاتەکانی تاقیکردنەوە و سەرجەم وردەکارییەکانی ساڵی نوێی خوێندن لەخۆدەگرێت.