بەغدا پارەی هێزە ئەمنییەکانی هەرێمی کوردستانی نارد

ئاڤا نیوز

 

وەزارەتی دارایی عێراق مووچەی هێزە ئەمنییەکان و سەرۆکایەتییەکانی هەرێمی کوردستانی ڕەوانە کرد، بەڕێوەبەری بانکە بازرگانییەکانی هەرێمی کوردستانیش پشتڕاستی دەکاتەوە کە پارەکە گەیشتووە.

 

وێنە گەورەکە: وەزارەتی دارایی عێراق بەشێوەی پچڕ پچڕ پارەی مووچەی مانگی شوباتی خستووەتە سەر هەژماری بانکیی هەرێمی کوردستان، پێشتر 600 ملیار دیناری ناردبوو، ئەمڕۆ تەواوکەری پارەکە ڕەوانەکراوە.

 

لێدوانی فەرمی: وەزارەتی دارایی عێراق ڕایگەیاند، پارە بۆ مووچەی دامودەزگا ئەمنییەکانی هەرێمی کوردستان بۆ مانگی شوبات نێردرا، ئەمەش بە پشتبەستن بە بڕیاری دادگەی باڵای فیدراڵیی عێراق.

 

لەلایەکی دیکەوە: مەولوود سابیر، بەڕێوەبەری بانکە بازرگانییەکان بە ئاڤا نیوزی گوت: کەمێک پێش ئێستا زیاتر لە 350 ملیار دینار لەو بەشەی مووچەی مانگی شوبات کە نەنێردرابوو، خرایە سەر هەژماری بانکیی وەزارەتی دارایی و ئابووریی هەرێمی کوردستان.

 

ئەوەی پێویستە بیزانیت: سەرەڕای نەناردنی بەشی مووچەی هێزە ئەمنییەکان و سەرۆکایەتییەکان، بەڵام بەگوێرەی خشتەی وەزارەتی دارایی هەرێمی کوردستان، ئەمڕۆ و سبەی دیوانی وەزارەتی پێشمەرگە، لیواکان، ئەنجوومەنی ئاسایش و دەزگای ئاسایش، هێزەکانی زێرەڤانی، یەکەکانی هەشتا و حەفتا، بەرگری و فریاکەوتن، پۆلیسی دامودەزگا نەوتییەکان و سەرۆکایەتییەکانی هەرێمی کوردستان مووچەی مانگی دوو وەردەگرن.