لەماوەی دوو هەفتەدا 16 هەزار پارچە زەوی لە سنووری هەولێر دابەش دەکرێن

ئاڤا نیوز

بەڕێوەبەرایەتی گشتیی شارەوانییەکانی هەولێر ئامادەکاریی دەکات بۆ ئەوەی ژمارەیەک پارچە زەوی دیکە، لە سنووری سێ شارەوانی دابەش بکات و 16 هەزار کەس لێی سوودمەند دەبن.

وێنە گەورەکە: هەنگاوەکانی ئامادەکردنی و دابەشکردنی زەوی لە سنووری بەڕێوەبەرایەتی گشتیی شارەوانییەکانی هەولێر خێراتر کراوە، ئامانجەکە ئەوەیە پێش کۆتایی ئەمساڵ سەرجەم سوودمەندبووان لە سنووری هەر 35 قەزا و ناحییەکەی هەولێر تیروپشکی وەرگرتنی زەوییان بۆ بکرێت.

لێدوانی فەرمی: مەریوان حاکم هادی، بەڕێوەبەری گشتیی شارەوانییەکانی هەولێر؛ بە ئاڤای گوت، "ئامادەکاری دەکەین بۆ ئەوەی لەماوەی دوو هەفتەدا تیروپشک بۆ دابەشکردنی 16 هەزار پارچە زەوی لەسنووری شارەوانییەکانی دارەتوو، بنەسڵاوە و کەسنەزان بکەین، بەسەر ئەوانەی کە سوودمەند دەبن دابەش بکرێت."

ئەمەش بزانە: 42 هەزار فەرمانبەر، پێشمەرگە و خانەنشین لە سنووری بەڕێوەبەرایەتیی شارەوانییەکانی هەولێر لە پرۆسەی وەرگرتنی زەوی سوودمەند دەبن، تاوەکو ئێستا سەرووی 10 هەزار کەس تیروپشکی وەرگرتنی زەوییان بۆ کراوە.