جەنگ هەڵنەگیرساوە؛ ئەمریکا مانگانە 410 ملیۆن دۆلار دژی ئێران خەرج دەکات

ئاڤا نیوز

ئیدارەی دۆناڵد تره‌مپ بۆ پاراستنی ئامادەباشیی سەربازی و فشارخستنە سەر تاران، مانگانە بڕی 310 بۆ 410 ملیۆن دۆلار تەنیا بۆ مانەوەی هێزەکانی لە ناوچەکەدا خەرج دەکات.

چیرۆکی سەرەکی: تاوەکو ئێستا جەنگی ڕاستەوخۆ لە نێوان ئێران و ئەمریکا هەڵنەگیرساوە بەڵام بەپێی بەدواداچوونەکانی "واشنتن پۆست"، "فۆکس نیوز" و "ئەکسیۆس"، وردەکاریی خەرجییە ڕۆژانەکانی ئەمریکا بەمشێوەیەیە کەفشارخستنە سەر تاران بەکاری دەهێنێت:

کەشتییە جەنگییەکان: کەشتیی فڕۆکەهەڵگری (USS Abraham Lincoln) و کەشتییە یاوەرەکانی، ڕۆژانە 6 بۆ 8 ملیۆن دۆلار تێچوویانە (خواردنی 5,000 سەرباز، کارەبا و چاککردنەوە).

فڕۆکە جەنگییەکان: هەر کاتژمێرێک فڕینی فڕۆکەی (F-35) بڕی 40,000 دۆلار لەسەر بودجەی پنتاگۆن دەکەوێت.

سیستەمی بەرگری: ئەمە گرانترین بەشە؛ تەنیا هاوێشتنی یەک مووشەکی (SM-2) یان پاتریۆت بۆ خستنەخوارەوەی درۆنێکی ئێرانی، 20,000 دۆلار تێچوویەتی.

لۆجیستیک: گواستنەوەی کەرەستە و پێداویستیی پزیشکی بۆ بنکەی "عودەید" لە قەتەر بە فڕۆکەی (C-17)، مانگانە 40 ملیۆن دۆلار خەرجی هەیە.

زانیاریی زیاتر: ئیدارەی تره‌مپ لە بەرامبەر ڕەخنەی "بارگرانیی بودجە"، چەند پاساوێکی هەیە؛ یەکەم، ئەم هێزە وەک کارتێکی گوشار ئێرانی هێناوەتە سەر مێزی دانوستان لە عومان. دووەم، پاراستنی ڕێڕەوەکانی بازرگانیی جیهانی و ڕێگری لە گرانبوونی نەوت. سێیەم، تره‌مپ داوای لە وڵاتانی دەوڵەمەندی کەنداو کردووە بەشێک لەم تێچووانە بگرنە ئەستۆ، چونکە ئەمریکا پارێزگاری لەوان دەکات.

ئەوەی پێویستە بیزانیت: ئەمریکا لە دوای جەنگی دووەمی جیهانییەوە، گەورەترین هێزی سەربازیی بیانییە لە ڕۆژهەڵاتی ناوەڕاست. لە ساڵی 2024 و 2025ـەوە بەهۆی هێرشەکانی گرووپە چەکدارەکان و ئاڵۆزییەکانی نێوان ئیسرائیل و ئێران، ئەمریکا ناچار بووە بڕی هێزەکانی بۆ ئاستێکی بێوێنە زیاد بکات.