لە 72 کاتژمێری داهاتوودا ئەنجامی زانکۆلاین ڕادەگەیێنرێت

ئاڤا نیوز

بڕیارە لە ماوەی 72 کاتژمێری داهاتوودا ئەنجامی زانکۆلاین ڕابگەیێنرێت. بەمەش قوتابیان ئاگادار دەکرێنەوە کە لە چ بەشێک و لە کام زانکۆ یان پەیمانگایەک وەرگیراون. 

چیرۆکی سەرەکی: دوای ئەوەی بۆ ماوەی دوو هەفتە سیستمی زانکۆلاین کارا بوو، لەو ماوەیەدا دەرچووانی پۆلی 12 بەپێی نمرەکانیان داواکارییان بۆ وەرگرتن لە زانکۆ و پەیمانگەکان پێشکەشکرد، لەماوەی 72 کاتژمێری داهاتوو، ئەنجامەکانیان ڕادەگەیێنرێت.

لێدوانی فەرمی: سەرچاوەیەک لە وەزارەتی خوێندنی باڵا و توێژینەوەی زانستیی هەرێمی کوردستان بە ئاڤای ڕاگەیاند،  سەرەتا بڕیار بوو ڕۆژی هەینی ئەنجامەکان بڵاوبکرێنەوە. بەڵام بۆ دڵنیابوون لەوەی هیچ کێشە و گرفتێک دروست نەبێت لە کاتی ڕاگەیاندنەکەدا، پێویستیان بە تاقیکردنەوەیەکی تەواوی سیستمەکە هەبووە.

زانیاریی زیاتر: بەگوتەی سەرچاوەکە، ڕۆژی شەممە سیستمی زانکۆلاین بە تەواوی تێست دەکرێت. چاوەڕێ دەکرێت هەر ئێوارەی شەممە یان ڕۆژی یەکشەممە، سیستمەکە کارا بکرێت و قوتابیان بتوانن لە ڕێگەی ماڵپەڕی فەرمی زانکۆلاینەوە ئەنجامەکانیان وەربگرنەوە.