موقتەدا سەدر لەبارەی هەڵبژاردنەوە داوایەک لە هێزە ئەمنییەکان دەکات

ئاڤا نیوز

 

ڕێبەری ڕەوتی نیشتمانیی شیعە جارێکی دیکە داوا دەکات بایکۆتی هەڵبژاردن بکرێت. هاوکات داوا لە هێزە ئەمنییەکانیش دەکات "عێراق ڕزگار بکەن" ئەمەش لەڕێگەی بایکۆت و هەڵنەبژاردنی "گەندەڵکاران"ـەوە.

 

چیرۆکی سەرەکی؛ ئەمڕۆ یەکشەممە دەنگدانی تایبەت لەسەرجەم پارێزگاکانی عێراق و هەرێمی کوردستان بۆ هەڵبژاردنی پەرلەمانی عێراق بەڕێوەدەچێت، بڕیاریشە ڕۆژی سێشەممە ڕێککەوتی 11ـی 11 دەنگدانی گشتیی بەڕێوەبچێت.

 

پەیامی فەرمی؛ موقتەدا سەدر، ڕێبەری ڕەوتی نیشتمانیی شیعە لە تۆڕی (ئێکس) نووسیویەتی، "فاتیمەی زەهرا (سڵاوی خوای لێ بێت) و ئیمامی عەلی (سڵاوی خوای لێ بێت) بایکۆتی گەندەڵانیان کرد و بوونە سەروەرانی چاکسازیخوازان و نموونەی باڵامانن".

 

لە بەشێکی دیکەی نووسینەکەیدا سەدر دەڵێت، "هەندێک لە شوێنکەوتووانی ئەمڕۆیان بانگەواز دەکەن: "گەندەڵتر بە گەندەڵان لاببەن" ئەمە بانگەوازێکە بۆ گەندەڵیی کە ئەو بنەمایەی دەڵێت؛ تاقیکراو تاقی ناکرێتەوە و وەلادەنرێت. ئێمە گەندەڵەکان بە چاکسازیی وەلا دەنێین، هەڵبژاردنی تاقیکراوەکان واتە چەسپاندنی گەندەڵتر و باڵادەستی گەندەڵکاران".

 

ئەوەی پێویستە بیزانیت؛ لە کۆتایی پەیامەکەیدا سەدر داوا دەکات، بایکۆتی هەڵبژاردن بکرێت و "عێراق ڕزگار بکەن"، ئەو بەرپرسیارێتییەش دەخاتە ئەستۆی هەمووان بە هێزە ئەمنییەکانیشەوە.