وەزارەتی گەنجینەی ئەمریکا: ئێران ئەمساڵ یەک ملیار دۆلاری داوەتە حیزبوڵڵا

ئاڤا نیوز

بەرپرسێکی ئەمریکی لە وەزارەتی گەنجینەی ئەمریکا ئاشکرای دەکات، واشنتن هەوڵدەدات سوود لەو دەرفەتە وەربگرێت کە لە لوبنان هەیە، تێیدا بتوانێت ئەو بودجەیەی ئێران بۆ حیزبوڵڵا دابینی دەکات بیبڕێت، ئاماژە بەوەش دەکات، ''لە ئەمساڵدا تاران یەک ملیار دۆلاری پێشکەش بە حیزبوڵڵا کردووە''.

وێنە گەورەکە: بەمەبەستی کەمکردنەوەی هەژموونی ئێران لە ناوچەکە، ئەمریکا داوا لە حکومەتی لوبنان دەکات گوشار لە حیزبوڵڵا و گرووپەکانی دیکە بکات بۆ ئەوەی چەکەکانیان دابنێن، حکومەتیش پابەندبوونی خۆی بەو داوایە دووپاتکردووەتەوە.

لێدوانی فەرمی: جۆن هێرلی، یاریدەدەری وەزیری گەنجینەی ئەمریکا بۆ تیرۆر و هەواڵگریی دارایی ڕایگەیاند، ئێران لە ئەمساڵدا نزیکەی یەک ملیار دۆلاری بۆ حیزبوڵڵا گواستووەتەوە، سەرەڕای سەرجەم سزا سەپێنراوەکان، هاوکات دەشڵێت، لە ئێستادا دەرفەتێکی ڕاستەقینە لە لوبنان هەیە کە ڕێگە خۆشکەرە بۆ ئەوەی حیزبوڵڵا چەکەکەی دابنێت.

زانیاریی زیاتر: ئەمریکا سیاسەتی"زۆرترین گوشار"ـی دژ بە ئێران گرتووەتەبەر، ئامانج لێی سنووردارکردنی پیتاندنی یۆرانیۆم و کاریگەریی ئەو وڵاتەیە لە ناوچەکە.