سێ كۆگای دەرمان لە هەولێر ئاگریان گرت و چەندین کەلوپەلی پزیشکیی ماوەبەسەرچوویان لێ دۆزرایەوە

ئاڤا نیوز 

شەوی ڕابردوو کاتژمێر 11 سێ كۆگای دەرمان و كەلوپەلی پزیشكی لەسەر ڕێگای هەولێر - گوێر ئاگریان گرت، بەوهۆیەوە چەندین کەلوپەلی پزیشکیی ماوەبەسەرچوویان لێ دۆزرایەوە.

 
لێدوانی فەرمی: موقدەم شاخەوان سەعید، وتەبێژی بەرگریی شارستانیی هەولێر بە ئاڤا میدیای ڕاگەیاند، دوای ئاگادارکردنەوەمان لە ئاگرکەوتنەوەیەک لە سێ كۆگای دەرمان، هەر زوو 10 تیمی بەرگریی شارستانیی هەولێر و دەوروبەر گەیشتنە شوێنی ڕووداوەکە و توانیمان ئاگرەکە بە یەک کاتژمێر كۆنتڕۆڵ بكەین.

 

زانیاریی زیاتر: وتەبێژی بەرگریی شارستانیی هەولێر ئاماژەی بەوەش کرد، هۆكاری ئاگرکەوتنەوەکە دیار نییە و لێکۆڵینەوە دەکرێت، بەڵام ئەو كۆگایانەی سووتان هیچ مەرجێكی سەلامەتیی و بەرگریی شارستانییان تێدا نەبوو.

 

زیانەکان؛ ڕووداوەکە هیچ زیانێکی گیانی نەبوو، بەڵام زیانێکی زۆری ماددی لێکەوتووەتەوە کە بە چەند ملیۆن دۆلارێک دەخەملێنرێت. 

 
ئەوەی پێویستە بیزانیت؛ وتەبێژی بەرگریی شارستانیی هەولێر گوتیشی، لەکاتی کوژاندنەوەی ئاگری ئەو کۆگایانە دەستیان بەسەر بڕێکی زۆری دەرمانی پزیشکیی ماوەبەسەرچوودا گرتووە کە بریتی بوون لە دەرمانی: بواری شێرپەنجە و دەرمانی پزیشیکیی بواری منداڵان.