ناوخۆی عێراق: پێنج هەزار ئالوودەبووی ماددەی هۆشبەر چارەسەر کراون

ئاڤا نیوز

وەزارەتی ناوخۆی عێراق ئاماری نوێی لەبارەی بەرەنگاربوونەوەی ماددە هۆشبەرەکان بڵاوکردەوە و ڕایگەیاند، لە ڕێگەی 16 سەنتەری تایبەتەوە هەزاران ئالوودەبووی ماددەی هۆشبەریان چارەسەرکردووە.

وێنە گەورەکە: لە ماوەی سێ ساڵی ڕابردوودا بەڕێوەبەرایەتیی گشتیی کاروباری ماددە هۆشبەرەکان لەوەزارەتی ناوخۆی عێراق، 230 تۆڕی بازرگانی ماددەی هۆشبەری هەڵوەشاندووەتەوە، لەنێویاندا 27 تۆڕیان نێودەوڵەتی بوون، لەهەمان کاتدا 43 هەزار بازرگان و هەڵگری ماددەی هۆشبەر د کە 150 کەسیان بیانی بوون دەستگیرکراون، هەروەها دەست بەسەر 28 تۆن ماددەی هۆشبەر و ملیۆنان حەبی دیکەی لەو جۆرە گیراوە.

لێدوانی فەرمی: عەبدولئەمیر شەممەری، وەزیری ناوخۆی عێراق لە میانی شەشەمین کۆنفرانسی زانستیی ساڵانە بۆ بەرەنگاربوونەوەی ماددە هۆشبەرەکان ڕایگەیاند: بە هەماهەنگی لەگەڵ وەزارەتی تەندروستی، وەزارەتەکەی 16 سەنتەری چارەسەرکردن بۆ ئاڵوودەبووانی ماددەی هۆشبەر لە سەرجەم پارێزگاکانی عێراق کردووەتەوە و تا ئێستا زیاتر لە پێنج هەزار کەس چارەسەری پێویستیان وەرگرتووە و لە ئاڵوودەبوون ڕزگار کراون.

زانیاریی زیاتر: چاودێران ئاماژە بەوە دەدەن، عێراق کە بۆ چەندین دەیە تەنیا وەک ڕێڕەوێک بۆ گواستنەوەی ماددە هۆشبەرەکان لە ئەفغانستان و ئێرانەوە بۆ ئەوروپا و وڵاتانی کەنداو هەژمار دەکرا، دوای ساڵی 2003 و بەهۆی ناسەقامگیری دۆخی ئەمنی و ئابوورییەوە، گۆڕاوە بۆ یەکێک لە بازاڕە سەرەکییەکانی بەکارهێنانی ماددەی هۆشبەر.

 
ئەمەش بزانە: سەبارەت بە جۆری ماددەکان و تەمەنی بەکارهێنەران، ئامارەکان دەریدەخەن کە ڕێژەی بەکارهێنان لە ناوچە هەژارنشینەکان گەیشتووەتە 17٪ و زۆرینەی بەکارهێنەران تەمەنیان لەنێوان 15 بۆ 30 ساڵدایە و بەربڵاوترین ماددەکانیش بریتین لە کریستاڵ بە ڕێژەی 37.3٪ و کاپتاگۆن بە ڕێژەی 34.35٪.