ئەعرەجی: لە دووبارە تێکەڵکردنەوەی خێزانەکانی داعش بە کۆمەڵگا سەرکەوتوو بووین

ئاڤا نیوز 

 

ڕاوێژکاری ئاسایشی نیشتمانیی عێراق دەڵێت، بەغدا بە پێویستی دەزانێت هەرچی زووە کەمپی هۆلی تایبەت بە ژن و منداڵانی داعش لە ڕۆژئاوای کوردستان دابخرێت، ئاشکراشی دەکات کە وڵاتەکەی لە دووبارە تێکەڵکردنەوەی خێزانەکانی داعش بە کۆمەڵگا سەرکەوتوو بووە.

 

ئەوەی پێویستە بیزانیت: بەوتەی بەرپرسانی ڕۆژئاوای کوردستان لەم کاتەدا زیاتر لە 24 هەزار کەس لە کەمپی هۆلی تایبەت بە ژن و منداڵانی داعش ڕاگیراون، لەو ژمارەیەش 15 هەزاریان سوورین، سێ هەزار و 500یان عێراقی و شەش هەزار و 200ی دیکەشیان بیانین، زیاتر لە 19 هەزار عێراقیش کە پێشتر لە کەمپەکە بوون، ئێستا بۆ وڵات گەڕێنراونەتەوە و بەشێکیان تێکەڵ بە کۆمەڵگا کراونەتەوە.

 

لێدوانی فەرمی: قاسم ئەعرەجی، ڕاوێژکاری ئاسایشی نیشتمانیی عێراق لە کۆبوونەوەیدا لەگەڵ شاندێکی هاوپەیمانیی ناتۆ باسی لەوەشکرد، عێراق بەلایەوە گرنگە کەمپی هۆل دابخرێت چونکە بۆ ئاسایشی وڵاتەکەی هەڕەشەیە و لەم کاتەشدا کار بۆ گەڕانەوەی عێراقییەکانی کەمپەکە دەکەن، لە دووبارە شیاندنەوەی ژن و منداڵی چەکدارانی داعش و تێکەڵکردنەوەشیان بە کۆمەڵگا سەرکەوتوو بوون.

 

 - تیرۆر لەسەر ئاشتیی کۆمەڵگا و ئاستی نێودەوڵەتی هەڕەشەیە و هێرشەکانی ئەم دواییە لە سیدنی، تەدموور و ئیدلیب نیشانەی ئەم مەترسییانەن، بۆیە دەبێت هەموو سەرچاوە مادیی، مرۆیی و میدیاییەکانیان وشک بکرێت.