ئاڤای خەڵک: لە پیرەمەگروون خەڵک و شارەوانی کێشەی جیاوازیان هەیە

ئاڤا نیوز

گەڕەکی شەهیدانی قەزای پیرەمەگروون 15 ساڵە بنیاتنراوە بەڵام تا ئێستا نەوەک قیر و چیمەنتۆ، تەنانەت کۆڵانەکانی چەوڕێژیش نەکراون. شارەوانیی پیرەمەگونیش دەڵێت ئەوانیش کێشەی ئامێریان هەیە و لەرێگەی ئاڤا داوا دەکەن بۆیان چارەسەر بکرێت.

چیرۆکی سەرەکی: لە قەزای پیرەمەگروونی سلێمانی گەڕەکێک هەیە بە ناوی شەهیدان، 15 ساڵە بنیاتنراوە بەڵام کۆڵانەکانی نە قیر و نە کۆنکرێت  نەکراون، دانیشووانەکەی دەڵێن بە زستان و بەهار ژیانیان نەماوە بەدەست قوڕ و چڵپاو، بە هاوین و پایزیش تەپوتۆز کوێریان دەکات.

داواکاریی خەڵک: ڕەفیق حەمەئەمین و شڤان ستار دانیشتوونی گەڕەکەکەن، قسەیان بۆ ژیوار عەبدولڕەحمان پەیامنێری ئاڤا کردووە، دەڵێن: تەنها یەک کێشەمان هەیە ئەویش خراپی کۆڵانەکانە، ژیانمان تاڵ بووە بەدەست قوڕ و چڵپاو، ئەگەر بۆشمان قیرناکەن داوا دەکەین هیچ نەبێت بۆمان چەوڕێژ بکەن، داواکاریمان ئەوەیە ڕزگارمان بێت لەدەست ئەم بارودۆخە ناخۆشە.

لێدوانی فەرمی: پێشڕەو عومەر 29 ڕۆژە وەک سەرۆکی شارەوانیی پیرەمەگروون دەستبەکار بووە، لەڕێگەی ئاڤا میدیا بەڵێن بە خەڵکی پیرەمەگروون دەدات پلان و کاری باشیان داناوە، لە هەوڵیشدان کێشەی گەڕەکی شەهیدان چارەسەر بکەن.

گۆشەیەکی دیکە: شارەوانیی پیرەمەگروون ئەوانیش کێشەیان هەیە، داوایان لە ئاڤا میدیا کرد دەنگی ئەوانیش بگەیێنێت.  پێشڕەو عومەر دەڵێت تەنها شۆفڵێک و گرێدەرێکمان هەیە، ماوەی 7 مانگە لەکارکەوتوون و پێویستیان بە چاککردنەوەیە، داوا دەکەین بۆمان چاک بکەنەوە، ئێمەش بەڵێن دەدەین یەکسەر دەست بە چەوڕێژکردنی کۆڵانەکانی گەڕەکی شەهیدان دەکەین، دواتریشن چیمەنتۆ یان قیریان دەکەین.