لە سنووری سۆران ڕێنمایی نوێ بۆ گیابەهارییەکان دەردەکرێن

ئاڤا نیوز

ئیدارەی سەربەخۆی سۆران چەند ڕێنماییەک بۆ وەرزی بەهار و شێواز و چۆنیەتی گیابەهارییەکان دەردەکات، هۆشداریش بە کەوشکاران دەدات هەر کەسێک سەرپێچی بکات بەتووندترین شێوە سزا دەدرێت.

چیرۆکی سەرەکی: سنووری ئیدارەی سەربەخۆی سۆران قەزاکانی: سۆران، خەلیفان، ڕواندز، چۆمان، سیدەکان و مێرگەسۆر دەگرێتەوە، ناوچەیەکی شاخاواییە و نزیکەی 400 جۆر گژوگیای بەهارەی جۆراوجۆری هەیە.

- ساڵانە هاونیشتمانیەکی زۆر ڕوو لە چیا و کێوەکانی باڵەکایەتی و برادۆست دەکەن بۆ هێنانی گژوگیا جۆراوجۆرەکان و لە بازاڕەکانیش خواستێکی زۆریان لەسەرە، بەتایبەت قارچک، ڕێواس، کەنگر، کاردی، لووشکە و ..هیتد، بەڵام ساڵانە بەهۆی نەزانینی ڕنینی گیاکان بەشێوەیەکی زانستی یان بێویژدانی بەشێک لە کەوشکەران، بەشێکی گیابەهارییەکان مەترسی لەناوچوونیان لەسەرە.

لێدوانی فەرمی: هەژار ماهیر، بەڕێوەبەری فەرمانگەی ژینگەی سۆران بە ئاڤا میدیای ڕاگەیاند: ئەمساڵ ڕێنمایمان داناوە هەر هاونیشتمانیەک سەرپێچی بکات و لەسەری ئاشکرا بێت کە سەرپێچی کردووە، سزای تووندی یاسایی و مادی دەدەین.

ڕێنماییەکان ئەمانەن:

1- لێکردنەوەی گیای بەهاری تەنها بە چەقۆ و بڕین ڕێگەپێدراوە. ڕاکێشان و تێکدانی گوڵ و گیاکان بە هەموو شێوەیەک قەدەغەیە، چونکە زیانێکی زۆر بە بن و ڕەگی گیاکان دەگەیێنێت، بەم هۆیەوە ساڵانە بڕێکی زۆریان لێ کەم دەبێتەوە و تووشی لەناوچوون دەبن.

2- دەرهێنانی گوڵ و گیاکان بە بنەوە بەهەموو شێوەیەک قەدەغەیە. لە هەر حاڵەتێک دا ئەگەر بنی گیایەک دەرهات بەهەڵە و بەبێ مەبەست، پێویستە لە شوێنی خۆی بچێنرێتەوە.

3- هێنانەوەی گیای بەهاری تەنها بۆ لێنان و دروستکردنی خواردن ڕێگەپێدراوە، بازرگانیکردن بەهەموو جۆرێکیانەوە و بەهەموو شێوەیەک قەدەغەیە.

4- هەر ڕێگایەکی تر کە ببێتە هۆی زیانگەیاندن بە سرووشت و گژوگیا بەهارییەکان قەدەغەیە.