سەرۆک بارزانی پەیامێک بۆ كوردانی ئێزدی دەنێرێت

ئاڤا نیوز

سەرۆک بارزانی بەهۆی هاتنی جەژنی ڕۆژووی ئێزی تایبەت بە ئێزدییەكان، پەیامێكی پیرۆزبایی ئاڕاستەی ئێزدییەكانی كوردستان و جیهان دەكات و دووپات لە زیاتر فراوانكردنی فەرهەنگی پێكەوەژیان و ئاشتیخوازیی هەرێمی كوردستان دەكاتەوە.

ئەوەی پێویستە بیزانیت: ڕۆژووی ئێزی، یەكێكە لە بۆنە ئایینیەكانی كوردانی ئێزدی كە هاوكاتە لەگەڵ ناوەڕاستی مانگی كانوونی یەكەمی هەموو ساڵێک، تێیدا لە كورتترین ڕۆژانی ساڵدا ئێزدییەكان سێ ڕۆژ لەسەریەك بەڕۆژوو دەبن و خۆیان دەبوورن لە هەموو جۆرە مامەڵەیەكی دونیایی و وتنی قسەی نەشیاو، هەروەها بەو بۆنەیەوە ئاژەڵ سەردەبڕن و گۆشتەكەی بە خێر دابەش دەكەن.

پەیامی فەرمی: سەرۆک بارزانی بەبۆنەی جەژنی ڕۆژووی ئێزی، پیرۆزبایی لە كوردانی ئێزدی لە ناوخۆی هەرێمی كوردستان و سەرانسەری جیهان کرد و هیوای خواست، ئەم جەژنە خۆشی و بەختەوەری بۆ خوشك و برایانی ئێزدی بهێنێت و بۆنەكانی جەژنەكە لە ئارامی و دڵخۆشی بگێڕن.

- سەرۆک بارزانی ئاماژەی بەوەشكرد، جێی شانازییە كە كوردستان وڵاتی برایەتی و پێكەوەژیان و ئاشتیخوازیی نێوان سەرجەم پێكهاتە ئایینی و نەتەوەییەكانە و بەپێویستی دەزانێت، ئەم فەرهەنگە فراوانتر ببێت.