لە ساڵی نوێ قەرەبووی خاوەن زەوییەکانی پشتێنەی سەوزایی هەولێر خەرج دەکرێت

ئاڤا نیوز

 

ڕێککارە یاسایی و داراییەکان بۆ قەرەبووکردنەوەی خاوەنی دامەزراوە و زەوییەکانی پشتێنەی سەوزایی تەواوکراوە، بەڵام خەرجکردنی قەرەبووەکەیان دەکەوێتە ساڵی داهاتوو.

 

چیرۆکی سەرەکی: لە جێبەجێکردنی پڕۆژەی پشتێنەی سەوزایی هەولێر، بەشێک لە زەوی، کارگە و کۆگای هاونیشتمانیان کەوتنە بەر پڕۆژەکە، دوای خەمڵاندنی بەڕێوەبەرایەتیی گشتیی کشتوکاڵی هەولێر، نزیکەی هەشت ملیار دینار تەرخان دەکرێت بۆ ئەو کەسانەی دامەزراوەکەیان بەرکەوتووە و ئەوانەشی زەویان بەرکەوتووە دواتر قەربوو دەکرێنەوە.

 

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای ڕاگەیاند، "128 کەس بەهۆی جێبەجێکردنی پڕۆژەی پشتێنەی سەوزایی قەرەبوو دەکرێنەوە، کە 96 کەسیان دامەزراوەیان بەرکەوتووە و بە پارە قەرەبوو دەکرێنەوە، چەکی بانکی سەرجەمیان تەواو بووە، بەڵام بەهۆی ئەوەی ساڵی دارایی کۆتایی دێت، بۆیە لە ساڵی نوێ قەرەبووەکەیان خەرج دەکرێت."

 

باکگراوند: پشتێنەی سەوزایی یەکێکە لە پڕۆژە ستراتیژییەکانی حکومەتی هەرێمی کوردستان، بە چارەسەرێکی گونجاو بۆ کەم کردنەوەی دیاردەی خۆڵبارین و بەرزکردنەوەی ڕێژەی سەوزایی دادەنرێت، لەو پڕۆژەیە ملیۆنان دار لە دەورووبەری شارەکە دەچێندرێن، لەگەڵ ئەوەشدا چەندین پۆندی گلدانەوەی ئاو دروست دەکرێن.