ئەمریکا و ئەرمینیا؛ ڕێککەوتنێکی 9 ملیار دۆلاری دژی ڕووسیا واژۆ دەکەن

ئاڤا نیوز

جەی دی ڤانس، جێگری سەرۆکی ئەمریکا و نیکۆڵ پاشینیان، سەرۆکوەزیرانی ئەرمینیا، ڕێککەوتنێکی مێژووییان لە بوارەکانی وزەی ئەتۆمی و ژێرخانی ستراتیژی واژۆ کرد بۆ گۆڕینی هاوسەنگیی هێز لە ناوچەی قەوقاز.

چیرۆکی سەرەکی: لە هەنگاوێکی ستراتیژیدا بۆ کەمکردنەوەی هەژموونی ڕووسیا لە ناوچەی قەوقاز، ئەمریکا و ئەرمینیا ڕێککەوتنێکی مێژووییان واژۆ کرد، جەی دی ڤانس، جێگری سەرۆکی ئەمریکا لە سەردانەکەی بۆ ئەرمینیا ڕێککەوتنێکی گەورەی لەگەڵ ئەو وڵاتەدا لەسەر پرسی پەرەپێدانی کەرتی وزەی ئەتۆم واژۆکرد، کە بە ڕێککەوتنی "123" ناسراوە.

زانیاریی زیاتر: ڕێککەوتنەکە ڕێگە بە ئەمریکا دەدات تەکنەلۆژیا و کەرەستەی ئەتۆمیی پێشکەوتوو بۆ ئەرمینیا دابین بکات. ئەم هەنگاوە ئامانج لێی جێگرتنەوەی وێستگەی کۆنی "مێتاسامۆر"ـە کە ڕووسیا پێشتر دروستی کردبوو.

لێدوانی فەرمی: نیکۆڵ پاشینیان، سەرۆکوەزیرانی ئەرمینیا، ئەم ڕێککەوتنەی بە "وەرچەرخانێکی نوێ" وەسف کرد. هاوکات جەی دی ڤانس، جێگری سەرۆکی ئەمریکا، ئاشکرای کرد: "قەبارەی سەرەتایی هەناردەی ئەمریکا بۆ ئەرمینیا دەگاتە 5 ملیار دۆلار، لەگەڵ 4 ملیار دۆلاری دیکە بۆ گرێبەستی درێژخایەنی سووتەمەنی، بە ئامانجی جێگرتنەوەی وێستگەی کۆنی مێتاسامۆر."

ئەمەش بزانە: جگە لە پرسی ئەتۆمی، ڤانس پڕۆژەیەکی دیکەی ستراتیژی بە ناوی "ڕێڕەوی تره‌مپ بۆ ئاشتی و خۆشگوزەرانی نێودەوڵەتی" ئاشكرا کرد؛ ڕێڕەوەکە درێژییەکەی 43 کیلۆمەتر دەبێت و باشووری ئەرمینیا دەبڕێت و ئازەربایجان بە تورکیاوە دەبەستێتەوە.