کیم جۆنگ ئون فەرمانی "فراوانکردنی بێسنوور"ی بەرهەمهێنانی مووشەک دەدات

ئاڤا نیوز 

کیم جۆنگ ئون، سەرۆکی کۆریای باکوور، لە سەردانێکی مەیدانیدا بۆ کارگەکانی چەک و تەقەمەنی، پلانی نوێی وڵاتەکەی بۆ ساڵی 2026 ئاشکرا کرد، کە بریتییە لە مۆدێرنکردن و زیادکردنی ڕێژەی بەرهەمهێنانی مووشەک.

وێنە گەورەکە: کۆریای باکوور دەیەوێت پێگەی خۆی وەک دابینکەرێکی سەرەکیی چەک بۆ ڕووسیا بەهێزتر بکات، هاوکات پەرە بە وردیی مووشەکەکانی بدات تاوەکو لە هەر کاتێکدا بێت هەڕەشە لە بەرژەوەندییەکانی ئەمریکا و کۆریای باشوور بکات.

لێدوانی فەرمی: کیم جۆنگ ئون، سەرۆکی کۆریای باکوور ڕایگەیاند: "بەهێزکردنی کەرتی بەرهەمهێنانی مووشەک و گوللـە تۆپ، کارێکی لەپێشینەیە بۆ گەشەپێدانی توانای بەرگریی جەنگیی وڵاتەکەمان و وەڵامدانەوەی هەر ئەگەرێکی نەخوازراو."

ڕاگەیێنراو فەرمی: ئاژانسی هەواڵی کۆریای باکوور (KCNA) بڵاوی کردەوە، کیم سەردانی چەندین کارگەی تەقەمەنی کردووە و فەرمانی داوە کارگەی نوێ دابمەزرێندرێن، تاوەکو وەڵامدەرەوەی ئەو خواستە زۆرە بن کە هێزە مووشەکی و تۆپخانەکانی سوپا لە ئێستادا هەیانە.

ژمارەکان وادەڵێن: لە دوو ساڵی ڕابردوودا کۆریای باکوور ژمارەیەکی پێوانەیی لە تاقیکردنەوەی مووشەکی تۆمار کردووە؛ شارەزایان پێشبینی دەکەن بە جێبەجێکردنی فەرمانە نوێیەکەی کیم، قەبارەی بەرهەمهێنانی چەک و مووشەک لە ساڵی 2026دا بۆ دوو هێندە زیاد بکات.