ئەنجوومەنی باڵای فەتوا لە ساڵێكدا وەڵامی زیاتر لە هەزار پرسیاری شەرعی داوەتەوە

ئاڤا نیوز

ئەنجوومەنی باڵای فەتوا ساڵی ڕابردوو 18 فەتوای دەركردووە و وەڵامی زیاتر لە هەزار پرسیاری شەرعی داوەتەوە.

وێنە گەورەکە: مەكتەبی تەنفیزیی یەكێتی زانایانی ئایینی كوردستان، ساڵانە كۆی ئاماری فەتوا و كۆبوونەوە و وەڵامدانەوەی پرسیارە شەرعییەكان بڵاو دەكاتەوە پەیوەست بەو پرس و بابەتانە كە جێی سەرنجی كۆمەڵگەی كوردین و پەیوەندییان بە ژیانی ڕۆژانەی خەڵكەوە هەیە.

لێدوانی فەرمی: عەبدوڵڵا شێركاوەیی، وتەبێژی یەكێتی زانایانی ئایینی كوردستان بە ئاڤای ڕاگەیاند، ساڵی ڕابردوو، ئەنجوومەنی باڵای فەتوا 18 فەتوای فەرمی دەركردووە و هەزار و 161 پرسیاری شەرعی وەڵامداوەتەوە كە ئاڕاستەی ئەنجوومەنەكە كراوە.

شێركاوەیی ڕوونیشی كردەوە، سەرجەمی ئەو فەتوا و پرسیارە شەرعیانە، پەیوەندیی ڕاستەوخۆیان بە كاروباری ڕۆژانەی هاووڵاتیانەوە بووە و جێی سەرنج بوونە.

وردەكاریی: ئەو فەتوا شەرعییانەی لە ساڵی 2025ـدا دەركراون پەیوەستن بە:

- حوكمی فرۆشتنی كارتی دەنگدان لە پرۆسەی هەڵبژاردن.

- حوكمی فرۆشتنی كەلوپەلی گەڕاوەی ئەمازۆن لە جۆرەكانی؛ ئەلیكترۆنی، میكس و پۆستەی گەڕاوەی (دی ئێچ ئێڵ).

- حوكمی شەرعی كڕین و فرۆشتنی بووكەڵەی (لابووبوو).

- حوكمی فرۆشتنی شوتی و كاڵەك و فەریكەنۆك.

- حوكمی فرۆشتنی زێڕ بە قەرز.

- حوكمی حەواڵەكردنی دراو بە قەرز یان بە حازر لەگەڵ گۆڕینەوەی بە دراوێكی تر.

- حوكمی پاككردنەوەی ئاوی پیس و سەرلەنوێ بەكارهێنانەوەی.

- حوكمی تەوافی ماڵئاوایی بۆ حەج و عومرە.

- حوكمی ئەنجامنەدانی نوێژی هەینی لەكاتی گەشت و سەیراندا.

- حوكمی بارسووكی و كارئاسانی لە پرۆسەی هاوسەرگیری و مارەیی

- حوكمی سواڵكردن و هاوكاریكردنی سواڵكەران.

- حوكمی وەرگرتنی كرێی دەڵاڵی لە كڕین و فرۆشتن زیاتر لە ئەندازەی دیاریكراو.

- حوكمی دانانی مەرجی غەرامە لەكاتی پەشیمانبوونەوە لە مامەڵە بازرگانییەكان.

- حوكمی شەرعی كاری مەندوبی و بریكارنامەی كۆمپانیاكان.

- حوكمی شەرعی لابردنی ڕەحمی منداڵی ناكام.

- حوكمی مامەڵەكردن بە پسوولەی گەنمی جووتیاران.

- حوكمی دیاریكردنی ڕێژەی زەكات و سەرفیترە و فیدیەی مانگی ڕەمەزانی 2025.

- حوكمی شەرعی ئیشكردن لە (فۆرێكس).