سعودیە کۆنگرەیەک بۆ لایەنەکانی باشووری یەمەن ڕێکدەخات

ئاڤا نیوز

 

دوای ئەوەی هێزەکانی "درع ئەلوەتەنی یەمەن" کە سعودیە پاڵپشتییان دەکات، کۆنتڕۆڵکردنەوەی چەند ناوچەیەکی گرنگیان لە باشوور و ڕۆژهەڵاتی وڵاتەکە لە هێزەکانی ئەنجوومەنی ڕاگوزەر ڕاگەیاند، ریاز بڕیاریدا کۆنگرەیەکی فراوان تایبەت بە داواکاریی پێکهاتەکانی باشووری یەمەن ڕێکبخات.

 

 چیرۆکی سەرەکی: هێزەکانی ئەنجوومەنی ڕاگوزەری باشووری یەمەن کە داوای سەربەخۆیی باشووری یەمەن دەکەن و ئیمارات پشتیوانییان دەکات، بەهۆی پێشڕەوییەکانی هێزەکانی "درع ئەلوەتەنی یەمەن" کە سعودیە پاڵپشتییان دەکات، لە ناوچە گرنگەکانی هەردوو پارێزگای مهرە لە ڕۆژهەڵات و حەزەرموت لە باشوور کشانەوە، ئەوەش هاوکات بوو لەگەڵ بڕیاریی ئەنجوومەنی ڕاگوزەر بۆ ئەنجامدانی ڕاپرسی لەسەر سەربەخۆیی لە دوو ساڵی داهاتوودا بۆ باشووری یەمەن.

 

بەیاننامەی فەرمی: وەزارەتی دەرەوەی سعودیە، لە بەیاننامەیەکی فەرمی، رایگەیاند، پێشوازیی لە رشاد علیمی، سەرۆکی ئەنجوومەنی سەرۆکایەتی یەمەن دەکەن، بۆ ئەنجامدان و بەشدارییکردنی لە کۆنگرەیەکی فراوانی تایبەت بە داواکاریی پێکهاتەکانی باشووری یەمەن، بۆ ئەوەی بەیەکەوە چارەسەرێکی دادپەروەرانە بۆ کێشەکانی باشووری یەمەن بدۆزینەوە.

 

زانیاریی زیاتر: لەسەر داواکاری رشاد علیمی، سەرۆکی ئەنجوومەنی سەرۆکایەتی یەمەن، سعودییە بڕیاریدا کۆنگرەیەکی فراوان بە بەشداری سەرجەم کەسایەتی و پێکهاتەکان بۆ خەڵکی باشووری یەمەن لە ڕیاز ڕێکبخات و تیایدا "دۆزی باشوور" تاوتوێ بکرێت.

 

ئەمەش بزانە: لەناو باشووری یەمەن ئەنجوومەنی ڕاگوزەر تیایدا باڵادەستە، کۆدەنگی لەسەر سەربەخۆیی نییە، بەجۆرێک لەکۆی پێنج پارێزگای باشوور، سێ پارێزگا داوای ڕاپرسی و سەربەخۆیی تەواو دەکەن، بەڵام بەگوێرەی قسەی هۆزەکان، پارێزگاکانی حەزەرموت و مهرە داوای حکومی خۆبەڕێوەبەریی و دەسەڵاتی فراوان دەکەن لە چوارچێوەی وڵاتی یەمەنی فیدڕاڵیدا.