کەشتیگەلە سەربازییەكانی ئەمریكا بەرەو ڕۆژهەڵاتی ناوەڕاست بەرێکەوتن

ئاڤا نیوز

دۆناڵد ترەمپ، سەرۆکی ئەمریکا ڕایگەیاند، کەشتیگەلە سەربازییەکانی وڵاتەکەی بەرەو سنوورەکانی ئێران بەڕێکەوتوون و هۆشداریی دا ئەگەر تاران لەسێدارەدان ڕانەگرێت، بنکە ئەتۆمییەکانی دەکرێنە ئامانج.

لێدوانی فەرمی: دۆناڵد ترەمپ، سەرۆکی ئەمریکا لە داڤۆس بە ڕۆژنامەنووسانی ڕاگەیاند: "کەشتیگەلی USS Abraham Lincoln بەرەو ڕۆژهەڵاتی ناوەڕاست بەڕێکەوتووە و لە سنووری ئێران نزیک دەبێتەوە؛ هیوادارین ناچارمان نەکەن کەشتییە سەربازییەکان بەکاربهێنین، بەڵام ئەگەر ئێران خەڵکی زیاتر لەسێدارە بدات، ئەوا هێرشی ئاسمانیی دەکەینە سەر بنکە ئەتۆمییەکانیان".

زانیاریی زیاتر: ئەم پەرەسەندنە سەربازییە لە کاتێکدایە کە واشنتن بە وردیی چاودێریی جموجۆڵەکانی ناوخۆی ئێران دەکات. ترەمپ جەختی کردەوە کە تەنها بە بژاردەی سەربازیی ناوەستێت، بەڵکو سزایەکی ئابووریی نوێی بەسەر ئەو وڵات و کۆمپانیایانەدا سەپاندووە کە بازرگانیی لەگەڵ ئێراندا دەکەن، بە جۆرێک هەر لایەنێک مامەڵەی دارایی لەگەڵ تاران هەبێت، ڕووبەڕووی 25% باجی گومرگیی ئەمریکا دەبێتەوە.

٠ ئەم ڕێکارە ئامانج لێی بڕینی تەواوەتیی سەرچاوە داراییەکانی ئێرانە و گۆشەگیرکردنیەتی لە ئاستی نێودەوڵەتییدا تاوەکو ئەو کاتەی تاران بە تەواویی پابەندی داواکارییەکانی ئەمریکا دەبێت لە دۆسیەی مافەکانی مرۆڤ و بەرنامە ئەتۆمییەکەیدا.