هێرش کرایە سەر خۆپیشاندەرانی کورد لە بەلجیکا

ئاڤا نیوز

لە شاری ئاندڤێرپی بەلجیکا، شەش خۆپیشاندەری کورد بە چەقۆ بریندار کران کە دووانیان دۆخی تەندروستییان مەترسیدارە.

ڕاگەیێنراوی فەرمی: پۆلیسی بەلجیکا ڕایگەیاند: "تاوەکو ئێستا چوار گومانلێکراو لەسەر ڕووداوەکە دەستگیر کراون و لێکۆڵینەوەکان بۆ ئاشکراکردنی هۆکاری ڕاستەقینەی هێرشەکە و ناسنامەی بکەران بەردەوامن".

زانیاریی زیاتر: ڕووداوەکە شەوی پێنجشەممە لە گۆڕەپانی ئۆپێراپلەین لە کاتێکدا ڕوویدا کە ڕەوەندی کوردیی بە شێوەیەکی مەدەنیی دژی هێرشەکانی سەر ڕۆژئاوای کوردستان کۆببووەوە.

ئەوەی پێویستە بیزانیت: شایەتحاڵەکان ئاماژە بەوە دەکەن کە خۆپیشاندانەکە زۆر بە ئارامیی بەڕێوەدەچوو، بەڵام بە شێوەیەکی کتوپڕ هێرشبەرێک بە چەقۆ کەوتە گیانی بەشداربووان. لە کۆی شەش بریندارەکە، دوو هاووڵاتیی کورد بەهۆی سەختیی برینەکانیانەوە لەژێر چاودێریی چڕی پزیشکییدان و دۆخیان جێگیر نییە.

ئەمەش بزانە: ڕەوەندی کوردیی لە بەلجیکا داوای لە دەسەڵاتداران کردووە کە بە توندیی سزا بەرامبەر تاوانباران بگرنە بەر و پاراستنی سەلامەتیی گردبوونەوەکان گەرەنتیی بکەن تاوەکو ڕووداوی هاوشێوە دووبارە نەبێتەوە.