مەزڵووم عەبدی: هەڵوێستی خەڵک و سەركردایەتیی هەرێمی كوردستان بەرز دەنرخێنین

ئاڤا نیوز

فەرماندەی گشتیی هێزەكانی هەسەدە هەڵوێستی خەڵک و سەركردایەتیی هەرێمی كوردستان بەرز دەنرخێنێت و پێزانینی قووڵی بۆ هەوڵەكانی سەرۆک بارزانی بۆ ڕاگرتنی شەڕ دەربڕی.

وێنە گەورەکە: لەگەڵ دەستپێكردنی شەڕ و گرژییەكانی سووریا و ڕۆژئاوای كوردستان، تا گەیشتن بە ڕێككەوتنی ئاگربەست لە 18ـی ئەم مانگەدا، سەركردایەتیی سیاسیی كورد بەتایبەت خودی سەرۆک بارزانی، هەوڵی بەردەوام و چڕی داوە لەپێناو نەهێشتنی ستەم و دەستدرێژی بۆ سەر كورد لە ڕۆژئاوای كوردستان و ڕاگرتنی ئەو شەڕەی كە بەرۆكی سووریای گرتووە.

لێدوانی فەرمی: مەزڵووم عەبدی، فەرماندەی گشتیی هێزەكانی سووریای دیموكرات هەسەدە لە ئەژماری فەرمیی خۆی لە تۆڕی كۆمەڵایەتی ئێكس، ستایشی هەوڵە سیاسی و دیپلۆماسییەكانی سەرۆک بارزانی و نێچیرڤان بارزانی، سەرۆكی هەرێمی كوردستان دەكات، بۆ هەوڵەكانیان لەپێناو پڕكردنەوەی كەلێنی نێوان هەسەدە و حكومەتی نوێی سووریا.

٠ عەبدی لە پەیامەكەیدا نووسیویەتی، " پێزانینی قووڵی خۆمان بۆ هەوڵەكانی سەرۆک مەسعوود بارزانی و نێچیرڤان بارزانی دەردەبڕین، كە لەم قۆناغەدا بەردەوامن لە پاڵپشتیکردنی هەوڵە سیاسییەکان بە هەماهەنگی لەگەڵ نێوەندگیری ئەمریکی، بەئامانجی گەیشتن بە ئاگربەست و دەستپێکردنەوەی گفتوگۆ و جێبەجێکردنی ڕێککەوتنە واژۆکراوەکان، كە گەرەنتی سەركەوتنی پرۆسەی یەكگرتنەوەی نێوان ئێمە و حكومەتی سووریا دەكات."

زانیاریی زیاتر: فەرماندەی گشتیی هەسەدە دووپاتیشی دەكاتەوە، هەڵوێستی هەرێمی كوردستان بە سەركردە و خەڵكەكەیەوە، جێی پێزانین و ڕێزە لەلای گەلەكەمان لە ڕۆژئاوای كوردستان.