هاتووچۆی هەولێر بۆ شۆفێران: ئەو ڕێگایانەی بەهۆی بەفر و شەختەوە داخراون بەکار مەهێنن

ئاڤا نیوز

هاتووچۆی هەولێر ڕێنمایی شۆفێران دەکات، ئەو ڕێگایانەی نێوان شار و شارۆچکەکان کە بەهۆی بەفر و شەختەوە داخراون بەکار نەهێنن، تا ئەو کاتەی لەلایەن تیمەکانی ڕاماڵینی بەفرەوە بەتەواوی پاک دەکرێنەوە. هاوکات بەڕێوەبەرایەتیی چاککردنەوە و پاراستنی ڕێگاوبانی هەولێر، لە سنووری پارێزگای هەولێر 13 ڕێگەی دیاری کردووە کە بەهۆی شەختە و بەستەڵەکەوە بۆ هاتوچۆکردن گونجاو نین

وێنە گەورەکە: شەپۆلێکی دیکەی بەفر و بارانبارین زۆربەی ناوچەکانی هەرێمی کوردستانی گرتووەتەوە و پلەکانی گەرماش نزم بوونەتەوە؛ بەهۆی کاریگەریی شەپۆلەکەوە، بەشێک لە ڕێگا دەرەکییەکان بە بەفر داپۆشراون و بەستوویانە، ئەمەش ئاستەنگی بۆ هاتوچۆی ئۆتۆمبێل دروست کردووە. بەڕێوەبەرایەتیی هاتوچۆی هەولێریش لەپێناو پاراستنی سەلامەتیی هاووڵاتییان و شۆفێران، کۆمەڵێک ڕێنمایی بڵاو کردووەتەوە و داوا لە شۆفێران دەکات لەکاتی لێخوڕینی ئۆتۆمبێلدا ڕەچاویان بکەن.

ڕاگەیێنراوی فەرمی: هاتووچۆی هەولێر لە ئاگادارینامەیەکدا، داوا لە شۆفێران دەکات بەهێواشی ئۆتۆمبێل لێبخوڕن و خێرایی کەم بکەنەوە، هاوکات دووریی دڵنیایی لەنێوان هەر ئۆتۆمبێلێک و ئۆتۆمبێلی پێش خۆی بهێڵنەوە، بۆ گرتنەبەری ڕێکاری خۆپارێزی لە هەر ڕاگرتنێکی کتوپڕ و لەناکاو.

٠ هاتووچۆی هەولێر داواش لە شۆفێران دەکات ڕووناکیی نزم بەکار بهێنن؛ هەروەها لەکاتی وەستان (برێکگرتن) بەهۆی هەبوونی بەفر لەسەر شەقام و ڕێگاکان، بە هێواشی برێک بگرن، بەوپێیەی بەهۆی کەمبوونەوەی ئاستی لێکخشانی تایە و قیڕی سەرشەقام، ئەگەری خلیسکانی ئۆتۆمبێل هەیە.

٠ هاتووچۆی هەولێر هۆشداری دەداتە هاووڵاتییان لە بەکارهێنانی ئەو ڕێگا دەرەکییانەی بەهۆی بەفر و شەختەوە داخراون، تا ئەو کاتەی لەلایەن تیمەکانی ڕاماڵینی بەفرەوە بەتەواوی پاک دەکرێنەوە.

پەیوەست بەم بابەتە: بەڕێوەبەرایەتیی چاککردنەوە و پاراستنی ڕێگاوبانی هەولێر، لە سنووری پارێزگای هەولێر 13 ڕێگەی دیاری کردووە کە بەهۆی شەختە و بەستەڵەکەوە بۆ هاتووچۆ گونجاو نین، تا ئەو کاتەی لەلایەن تیمەکانیانەوە هەوڵی خاوێنکردنەوەی ڕێگاکان دەدرێت و خوێیان پێدا دەپڕژێنرێت.

ڕێگاکان ئەمانەن:

1. ڕێگای سەرەکیی شەقڵاوە - هیران.
2. ڕێگای سەرەکیی حوجران - قەڵاسنج - دەربەند.
3. ڕێگای سەرەکیی تونێلی پیرمام - کۆڕێ.
4. ڕێگای سەرەکیی لۆفەکانی زینەتیر.
5. ڕێگای سەرەکیی گردجاسووسان - ئەسپیندارە - فریز.
6. ڕێگای سەرەکیی گۆمەسپان.
7. ڕێگای سەرەکیی لۆفەکانی سەفین.
8. ڕێگای سەرەکیی کاوانیان - سۆرک.
9. ڕێگای سەرەکیی کاوانیان - میراوە.
10. ڕێگای سەرەکیی زیارەت - سماقوڵی.
11. ڕێگای سەرەکیی گەرۆتە.
12. ڕێگای سەرەکیی میراوە - ماوەران - تونێلی میراوە.
13. ڕێگای سەرەکیی هەورازەنەفت بەرەو لۆفەکانی چیای سەفین.