خولی فریاکەوتنی خێرا بۆ سەرپەرشتیار و حەملەدارانی حەج و عومرە دەکرێتەوە

ئاڤا نیوز

لە پێناو پاراستنی سەلامەتیی ئەو هاووڵاتییانەی لە گەشتی حەج و عومرەدا تووشی تێکچوونی لەناکاوی دۆخی تەندروستییان دەبن، سەرپەرشتیاران، حەملەداران و خاوەن کۆمپانیاکانی حەج و عومرە شارەزای وانەکانی فریاگوزاریی خێرا دەکرێن؛ بۆ ئەم مەبەستەش بەڕێوەبەرایەتیی گشتیی حەج و عومرە داوای هەماهەنگی لە مانگی سووری عێراقی دەکات.

چیرۆکی سەرەکی: ڕۆژی پێنجشەممە لە هەولێر، بەڕێوەبەرایەتیی گشتیی حەج و عومرەی هەرێمی کوردستان بە سەرپەرشتیی شێخ وریا مەولانا خالید، بەڕێوەبەری گشتیی حەج و عومرە، لەگەڵ هاوڕێ ئیحسان، بەرپرسی لقی هەولێری مانگی سووری عێراقی و بەشێک لە کارمەندانی دەزگاکە کۆبوونەوە.

لێدوانی فەرمی: کاروان ستونی، وتەبێژی حەج و عومرەی هەرێمی کوردستان بە ئاڤای ڕاگەیاند، ئامانجی کۆبوونەوەکە شارەزاکردنی کارمەندان و سەرپەرشتیارانی گەشتی حەج و عومرە بوو بە وانە پراکتیکییەکانی فریاکەوتنی خێرا؛ بۆ ئەمەش پێشنیازی کردنەوەی خولی فریاگوزاریی خێرا کرا کە لە لایەن مانگی سووری عێراقییەوە سەرپەرشتی بکرێت.

کاروان ستونی باسی لەوەش کرد، مەبەست لە خولەکە شارەزاکردنی کارمەندانی بەڕێوەبەرایەتیی حەج و عومرە و خاوەن کۆمپانیاکانی ئەم بوارەیە، بۆ چارەسەرکردنی هەر حاڵەتێکی تەندروستیی کتوپڕ کە لە گەشتی حەج و عومرەدا ڕوو دەدات.

بابەتە ستراتیژییەکە: لە کۆبوونەوەکەدا بڕیار درا هەفتەی داهاتوو، یەکەم خولی فریاکەوتنی خێرا بۆ حەملەدار و خاوەن کۆمپانیاکانی حەج و عومرە ڕێک بخرێت.