دەرفەتی خوێندنی باڵا بۆ قوتابییانی هەرێمی کوردستان لە زانکۆکانی ئیسپانیا فراوانتر دەکرێت

ئاڤا نیوز

دووەم یاداشتنامەی لێکتێگەیشتن لە ماوەیەکی کورتدا لەنێوان نوێنەرایەتیی حکومەتی هەرێمی کوردستان لە ئیسپانیا و زانکۆکانی ئەو وڵاتە واژۆ دەکرێت، بەمەش بواری خوێندنی باڵای ماستەر و دکتۆرا لەنێوان هەرێمی کوردستان و ئیسپانیا دەچێتە قۆناغێکی نوێوە.

چیرۆکی سەرەکی: ئەمڕۆ 12ـی شوبات، نوێنەرایەتیی حکوومەتی هەرێمی کوردستان لە ئیسپانیا، یاداشتنامەیەکی لێکتێگەیشتنی لەگەڵ زانکۆی قورتۆبا واژۆ کرد. ئەمەش دووەم یاداشتنامەی لێکتێگەیشتنە کە لە ماوەی سێ مانگی ڕابردوودا لەگەڵ زانکۆکانی ئیسپانیا واژۆ دەکرێت.

لێدوانی فەرمی: دارەوان حاجی حامید، نوێنەری حکوومەتی هەرێمی کوردستان لە ئیسپانیا دەڵێت: "ئەم جۆرە یاداشتنامانە یەکێکن لە کاریگەرترین بوارەکانی دیپلۆماسی کە پەیوەندییە ئەکادیمییەکانی هەرێمی کوردستان و ئیسپانیا دەبەنە قۆناغێکی نوێوە، هاوکات دەرفەتێکی گرنگیش لە بواری زانکۆییدا بۆ خوێندکاران و قوتابییانی هەرێمی کوردستان دەڕەخسێنن."

٠ نوێنەرەکەی حکومەتی هەرێم باسی لەوەش کرد کە ئیسپانیا یەکێکە لە وڵاتە پێشکەوتووەکانی بواری خوێندن و توێژینەوەی زانستی و ساڵانە لە ڕێگەی زانکۆکانەوە، سەرجەم داهێنانەکانیان تێکەڵ بە کەرتی گشتی و تایبەت دەکرێن.

بۆچی گرنگە: واژۆکردنی یاداشتنامەی لێکتێگەیشتن لەگەڵ زانکۆکانی ئیسپانیا، کاریگەریی ڕاستەوخۆی دەبێت بۆ پێشخستنی پەیوەندییەکانی هەرێمی کوردستان و ئیسپانیا بەگشتی و بواری خوێندنی باڵا و وەزارەتی خوێندنی باڵای حکوومەتی هەرێمی کوردستان بەتایبەتی.

ئەمەش بزانە: هاوکات نوێنەری حکومەتی هەرێمی کوردستان داوای کرد لە داهاتوودا پارکێک یان شوێنێکی شارەکە بە ناوی پێشمەرگەوە بکرێت، کە لە جیاتی هەموو جیهان، شەڕی بەرامبەر دڕندەترین ڕێکخراوی تیرۆریستیی ناسراو بە داعش کرد و تێکی شکاندن.