زیاتر لە 10 هاونیشتمانیی هەرێمی کوردستان لە سعودیە دەستگیرکراون

ئاڤا نیوز

بەدواداچوون بەردەوامە بۆ چارەنووس و کاروباری ئەو هاونیشتمانیانەی بۆ حەجکردن بە ڤیزای گەشتیاری چوونەتە سعودیە، زیاتر لە 10 کەسیش هێشتا لە زیندانەکانی ئەو وڵاتەن.

وێنە گەورەکە: ئەمساڵ هەزاران کەس بەمەبەستی بەجێگەیاندنی فەریزەی حەج بە  ڤیزای ساڵی و ڤیزای گەشتیاری لە هەرێمی کوردستانەوە چوونە سعودیە، لە سەرەتای پرۆسەکەشەوە تاوەکو ئێستا دووچارەی کێشە و ئاستەنگی زۆر بوون.

 

ئەوەی پێویستە بیزانیت: لەسەر ڕاسپاردەی سەرۆکوەزیران بارزانی، نوێنەری وەزارەتی ئەوقاف ڕاسپێردراوە بۆ پێشکەشکردنی کارئاسانی تەواو بۆ ئەو حاجییانەی دووچاری کێشە هاتوون.

لێدوانی فەرمی: د.سیروان عەبدولرەحمان، نوێنەری هەرێمی کوردستان لە دەستەی باڵای گشتیی حەج و عومرەی عێراق بە ئاڤا نیوزی گوت: لەگەڵ کونسوڵخانەی عێراق لە شاری جەدە بەدواداچوون دەکەین بۆ ئەوانەی ونبوون یان مردوون یانیش دەستگیرکراون.

زانیاریی زیاتر: د.سیروان دەڵێت؛ تا ئێستا تەرمی 23 حاجی دۆزراوەتەوە و لە نەخۆشخانەکانی شاری مەککەن، زیاتر لە 10 هاونیشتمانی هەرێمی کوردستان دەستگیرکراون و لەڕێگەی پارێزەری کونسوڵخانە سەرقاڵین بۆ ئازادکردنیان، 30 پاسپۆرتی کاتیش بۆ ئەو حاجیانەی پاسپۆرتیان ونکردووە دروست کراوە.