هیندستان ڕاهێنانی یۆگا بە ژمارەیەک هاونیشتیمانی هەرێمی كوردستان دەكات

ئاڤا نیوز

 

كونسوڵخانەی هیندستان لە هەولێر ژمارەیەک هاونیشتیمانی بۆ ڕاهێنانی یۆگا دەباتە وڵاتەكەی.

وێنە گەورەکە: چەند ساڵێکە لە هەرێمی کوردستان ڕاهێنانی یۆگا لە چەند سەنتەرێک ئەنجام دەدرێت، لەگەڵ ئەوە کونسوڵخانەی هیندستان چەندین چالاکی جیاواز بۆ ئەنجامدانی یۆگا لە هەرێمی کوردستان ئەنجام دەدات.

لێدوانی فەرمی: سەردار ئیسماعیل، بەڕێوەبەری گشتی وەرزش لە هەرێمی کوردستان بە ئاڤا نیوزی گوت: سەرەتای ئەم هەفتەیە نووسراو بۆ هەر حەوت بەڕێوەبەرایەتییەکەی وەرزش دەکەین، بۆ هەر شارێک کەسێک دەستنیشان دەکەین و کونسوڵخانەی هیندستان بۆ هەر جارێک پێنج کەس دەبەن و بۆ ماوەی سێ هەفتە ڕاهێنانیان پێدەکەن.

زانیاریی زیاتر: تا ئێستا بەشێوەی فەرمی، هیچ سەنتەرێكی یۆگا لە وەزارەتی ڕۆشنبیری ناویان تۆمارنەکراوە، سەرقاڵین بۆئەوەی فیدارسیۆنی تایبەت بە یۆگا دابمەزرێنین، دوای ئەمە مۆڵەت دەدرێتە سەنتەرەکان.

لە لایەکی دیکەوە: مەحمود شێرزاد، ڕاهێنەر و بەڕێوەبەری ماڵی هەناسەی یۆگا لە سلێمانی بە ئاڤا نیوزی گوت: چوار سەنتەر بەشێوەی فەرمی کاری یۆگا دەکەن و هەر چوار سەنتەرەکە لە شاری سلێمانین، لقی یەکێک لەو سەنتەرانە لە هەولێر هەیە.

 

ئەوەی پێویستە بیزانیت: ڕۆژی 21ی مانگی حوزه‌یران به‌ رۆژی جیهانی یۆگا ده‌ستنیشانكراوه‌،  شاره‌زایانی یۆگا پێیانوایه‌ یه‌كه‌م ڕۆژی وه‌رزی هاوینه‌ و خۆر ده‌گاته‌ نیوه‌ی گۆی زه‌وی.