عێراق ئۆتۆمبێلی کارەبایی بەرهەم دەهێنێت

ئاڤا نیوز 

 

دەستەی پیشەسازیی سەربازیی عێراق پلانی هەیە لەمساڵدا دەست بە بەرهەمهێنانی ئۆتۆمبێلی کارەبایی بکات و ساڵانە 24 هەزار ئۆتۆمبێل بەرهەم بهێنێت. 

 

چیرۆکی سەرەکی: دەستەی پیشەسازیی سەربازیی عێراق دەست بە بەرهەمهێنانی ئۆتۆمبێلی کارەبایی بە براندی (Gold) دەکات، عێراقییەکان دەتوانن بە نرخێکی گونجاو سوودمەند بن، ژمارەی بە خۆڕاییە و باج و گومرگی لەسەر نییە.

 

لێدوانی فەرمی: قوسەی عەلی کەریم، بەڕێوەبەری پەیوەندییەکان و ڕاگەیاندنی دەستەکە ئاشکرای دەکات، بەرهەمهێنانی ئۆتۆمبێلی کارەبایی چووەتە هێڵی بەرهەمهێنان توانای بەرهەمهێنانیان 24 هەزار ئۆتۆمبێلە لە ساڵێکدا، کە کوالێتی ئۆتۆمبێلەکان بەرزە و چەندین جۆر ئۆتۆمبێل بەرهەم دەهێنن وەک، دوو دەرگا، چوار دەرگا و پیک ئەپ و چەندین جۆری دیکەش. 

 

زانیاریی زیاتر: یەکێک لە کۆمپانیا چینییە بەناوبانگەکان پشتیوانی عێراق دەکات و دەڵێت "ئۆتۆمبێلەکە توانای بەرگەگرتنی کەشوهەوای گەرمی عێراقی هەیە".

 

لەلایەکی دیکەوە: عەلی عەوادی، بەڕێوەبەری کۆمپانیای گۆڵد پێشووتر بە میدیا عێراقییەکانی ڕاگەیاندبوو، ئۆتۆمبێلەکە 100% عێراقییە و لە مانگی ئاب دەست بەرهەمهێنانی دەکرێت، لە ساڵی یەکەمدا تەنیا چوار مۆدێلی لێ بەرهەم دەهێنرێت، بزوێنەر و پاتری و ساردکەرەوەکەی توانای بەرگەگرتنی گەرمای هاوینی بۆ سەرووی 50 پلەی سیلزی هەیە. 

 

ئەوەی پێویستە بیزانیت: نرخەکەی لە نێوان 5 ملیۆن تاوەکو 6.5 ملیۆن دیناری عێراقییە، کە حکومەتی عێراق پشتیوانی دەکات و ژمارەکەشی بەخۆڕاییە.